Շիրակ Թորոսյան. Սահակաշվիլիի կողմնակիցները հայերենին տարածաշրջանային լեզվի կարգավիճակ տալու հարցը կօգտագործեն իրադրությունը սրելու համար
Օրերս Ախալքալաք քաղաքի ներկայացուցչական մարմինը որոշել էր դիմել երկրի իշխանություններին՝ հայերենին տարածաշրջանային լեզվի կարգավիճակ տալու հարցով: Այս մասին այսօր՝ մարտի 21-ի մամուլի ասուլիսում հայտարարել է ՀՀԿ-ական պատգամավոր, «Ջավախք» հայրենակցական միության նախագահ Շիրակ Թորոսյանը:
Ընդհանուր առմամբ դրական գնահատելով նախաձեռնությունը՝ պատգամավորն, այնուամենայնիվ, մատնանշել է «ստորջրյա խութերը»: Բանն այն է, որ այդ մարմինը ձեւավորվել էր Վրաստանի նախագահ Միխայիլ Սահակաշվիլիի աշխատակազմի անմիջական ճնշմամբ, ընդ որում՝ բացահայտ նշվել է, որ սակրեբուլոն թույլ չի տա, որ տվյալ հարցը մնա օրակարգում: «Ինչպես է ստացվում, որ այդ մարմինը հանկարծ հայտնվում է մյուս ճամբարում: Ընդ որում՝ պնդում են, որ նախաձեռնությունը ծագում է «Վրացական երազանքից»: Դա վարչապետ Բիձինա Իվանիշվիլիին հանդիմանելու առիթ կտա՝ տարածաշրջանում ազգայնական շարժումներին աջակցելու համար: Այսինքն՝ իրականում հարցն օգնում է սրել տարածաշրջանի իրավիճակը», – նշել է Շիրակ Թորոսյանը
Ըստ նրա՝ հայերենին տարածաշրջանային կարգավիճակ տալը բխում է Վրաստանի շահերից, հաշվի առնելով, որ ազգային փոքրամասնությունների լեզուների նկատմամբ նման վերաբերմունքը համահունչ է Եվրոպայի մոտեցումներին: Սակայն պետք է հաշվի առնել, որ Ջավախքում Միխայիլ Սահակաշվիլին վարել է ադրբեջանաթուրքական ազդեցությամբ թելադրված քաղաքականություն: «Դա սպասելի էր: Հրաժարվելով զարգացնել հարաբերությունները Ռուսաստանի հետ՝ Վրաստանն այսպես թե այնպես պետք է ընկներ Թուրքիայի ազդեցության տակ»:
Դիվանագետն ընդգծել է, որ Ջավախքում չի եղել եւ չկա անջատականություն: «Դա նախկին իշխանությունների քաղաքական զրպարտությունն է, որոնք առաջնորդվել են Դոն Կիխոտի մոտեցումներով եւ պայքարել «հողմաղացների» դեմ: Այսինքն խոսել են անջատականության մասին՝ ճնշում գործադրելու, ադրբեջանաթուրքական նախագծերն իրականացնելու համար: Մենք պետք է Բիձինա Իվանիշվիլիին ինչպես Վրաստանի, այնպես էլ Ջավախքի վերաբերյալ իր խոստումները կատարելու հնարավորություն տանք», – ընդգծել է Շիրակ Թորոսյանը:news.am