Վրաստանն այլևս չի ընկալում Ռուսաստանը որպես գլխավոր թշնամի. Իվանիշվիլի
Վրաստանի ռազմական նոր դոկտրինում Ռուսաստանն այլևս չի դիտարկվում որպես թշնամի, ինչպես դա Ազգային անվտանգության խորհրդի կողմից մշակված նախկին փաստաթղթում էր։ «Ռուսթավի-2» հեռուստաալիքին տված հարցազրույցում նման հայտարարություն է արել Վրաստանի վարչապետ Բիձինա Իվանիշվիլին, հայտնում է Russia Today-ը։
Նոր փաստաթուղթը, ինչպես և արտաքին հարաբերությունների խորհրդարանական հանձնաժողովի կողմից ընդունված փաստաթուղթը, նախատեսում է տոնայնության մեղմում։ Վրաստանի վարչապետը նշել է, որ հռետորության փոփոխության շնորհիվ հնարավոր է դարձել բացել ռուսական շուկային հասանելիությունը։
Իվանիշվիլին նշել է նաև, որ ռուս-վրացական հարաբերությունների վերականգնման համար լավ սկիզբ է դրվել։
«Ես չունեմ էյֆորիա, որ մոտ ապագայում մենք կարող ենք վերականգնել երկրի տարածքային ամբողջականությունը, սակայն դրա համար առաջիկա տարիներին մենք պետք է հիմնենք իրական ժողովրդավարական ինստիտուտներ»,- ասել է վարչապետը։
tert.am