Սերգեյ Մինասյան. Վրաստանի նոր իշխանությունները կփորձեն նորմալ հարաբերություններ հաստատել Ռուսաստանի հետ
Վրաստանի հետ կապված ամենակարեւոր սպասումները կապված են հոկտեմբերի հետ, երբ ավարտվում է Միխայիլ Սահակաշվիլիի նախագահության երկրորդ ժամկետը: Այս մասին հունիսի 12-ին, մամուլի ասուլիսում նշեց Կովկասի ինստիտուտի փոխտնօրեն, քաղաքագետ Սերգեյ Մինասյանը:
Նրա խոսքով՝ Վրաստանի նոր իշխանություններն ավելի ազատ կլինեն ինչպես արտաքին, այնպես էլ ներքին հարցերում: «Հայաստանի համար շատ կարեւոր , որ նոր իշխանության գալուց հետո մի փոքր բարելավում է նկատվում ռուս-վրացական հարաբերություններում, սակայն դա չի նշանակում, որ Վրաստանի արտաքին քաղաքական վեկտորը կփոխվի: Հակառակը, այդ երկրի քաղաքականությունը շարունակվում է նույն ոգով»,-ասաց Մինասյանը՝ հավելելով, որ Վրաստանի արտաքին քաղաքականությունը ավելի մեղմ, զգուշավոր եւ պրագմատիկ կդառնա:
Նա նաեւ ընդգծել է, որ Վրաստանի վարչապետ Բիձինա Իվանիշվիլին չի օգտագործի այն վտանգավոր գործիքը, որն օգտագործում էր Սահակաշվիլին՝ փորձելով տեղի ու անտեղի սրել հարաբերությունները Ռուսաստանի հետ:
«Վրաստանի նոր իշխանությունները կշարունակեն զարգացնել հարաբերությունները ինչպես Եվրոպայի, այնպես էլ ՆԱՏՕ-ի հետ, բայց նրանք կփորձեն վերականգնել նորմալ հարաբերությունները նաեւ Ռուսաստանի հետ: Ընդ որում, դա բոլորովին չի նշանակում, որ կվերականգնվեն դիվանագիտական հարաբերությունները, քանի որ գոյություն ունեն Աբխազիայի եւ Հարավային Օսիայի խնդիրները»,-ընդգծեց քաղաքագետը:
news.am