Սուխումում «օրենքով գողերի» սպանության մեջ կասկածվողները կարող էին փախչել դեպի Վրաստան. լրատվամիջոց

Ուրբաթ ցերեկը Սուխումում սպանություն կատարած կասկածյալները կարող էին փախչել դեպի Վրաստան, ինչի հետ կապված Ինգուր գետով անցնող այս պետության սահմանը ժամանակավորապես փակ է, հայտնում է ՏԱՍՍ-ը՝ վկայակոչելով հանրապետության հատուկ ծառայությունում աղբյուրին:

«Տեղեկություն կա, որ չարագործները հանցագործության իրագործումից հետո կարող էին հանրապետության տարածքը լքել Վրաստանի ուղղությամբ, ինչի հետ կապված ուրբաթից սահմանը փակ է, ոչ ոքի բաց չեն թողնում»,- ասել է գործակալության զրուցակիցը: Նրա խոսքով՝ սահմանափակումները ժամանակավոր բնույթ ունեն, սակայն առայժմ հայտնի չէ, թե երբ կչեղարկվեն:

Ուրբաթ Սուխումի կենտրոնում փոխհրաձգության հետեւանքով, որը Սան Ռեմո ռեստորանի ամառային ծածկապատշգամբի ուղղությամբ ավտոմեքենայից կատարել էին դիմակավորված երեք անհայտ անձինք, զոհվել է 2 «օրենքով գող»՝ Ալխաս Ավիձբան եւ Աստամուր Շամբան: Սուխումի 22-ամյա բնակիչ մատուցողուհին, որն այդ պահին մոտեցել է սեղանին, գլխին հրազենային վնասվածք է ստացել եւ կրիտիկական վիճակում վերակենդանացման բաժանմունքում է: Եվս երեք մարդ տարբեր աստիճանի ծանրության վնասվածքներ են ստացել, սակայն նրանց կյանքին վտանգ չի սպառնում:

Սուխումում տեղի ունեցածի հետ կապված հանրապետության նախագահ Ռաուլ Խաջիմբան ուրբաթ Անվտանգության խորհրդի նիստ է անցկացրել եւ ուժային կառույցների առաջ խնդիր է դրել հանցագործության բացահայտման եւ մեղավորներին պատասխանատվության ենթարկելու համար ներգրավել բոլոր ստորաբաժանումները: ՆԳՆ տեղեկություններով՝ գերչատեսչության անձնակազմը ոտքի է հանված տագնապով, բոլոր անցակետերը փակված են, աշխատում են միլիցիայի, Գլխավոր դատախազության, Պետական անվտանգության ծառայության աշխատակիցներից կազմված օպերատիվ-հետաքննչական խմբեր: news.am

---

---