Մարգվելաշվիլիի առաջին պաշտոնական այցը կլինի Վիլնյուսի «Արեւելյան գործընկերության» գագաթաժողովը
Որպես պետության նախագահ՝ Գեորգի Մարգվելաշվիլին իր առաջին պաշտոնական այցով կմեկնի Լիտվա՝ «Արեւելյան գործընկերության» գագաթաժողովին մասնակցելու: Այս մասին հոկտեմբերի 29-ին հայտարարել է Վրաստանի արտգործնախարարի տեղակալ Դավիթ Զալքալիանին:
Ըստ նրա՝ Մարգվելաշվիլին «Արեւելյան գործընկերության» գագաթաժողովում կգլխավորի վրացական պատվիրակությունը, որը տեղի կունենա Վիլնյուսում՝ նոյեմբերի 28-29-ին:
«Վրացական պատվիրակության կազմում կլինի նաեւ Վրաստանի արտգործնախարար Մայա Փանջիկիձեն», – ասել է Զալքալիանին:
Հիշեցնենք, որ Վիլնյուսի գագաթաժողովի ընթացքում սպասվում է ԵՄ-ի եւՎրաստանի միջեւ Ասոցացման համաձայնագրի նախաստորագրումը:
Վրաստանում նախագահական ընտրությունները տեղի են ունեցել հոկտեմբերի 27-ին, նախագահի երդմնակալությունը տեղի կունենա նոյեմբերի 17-ին: Ըստ Վրաստանի ԿԸՀ-ի նախնական տվյալների՝ Մարգվելաշվիլին հավաքել է 62,11% ձայն:
news.am