Սահակաշվիլին եւ Շեւարդնաձեն Վրաստանի նոր նախագահի երդմնակալությանը մասնակցելու հրավեր կստանան
Վրաստանի նոր նախագահ Գեորգի Մարգվելաշվիլիի երդմնակալության արարողությանը կհրավիրվեն Էդուարդ Շեւարդնաձեն եւ Միխայիլ Սահակաշվիլին: Այս մասին հայտարարել է երկրի արտգործնախարար Մայա Փանջիկիձեն:
«Հոկտեմբերի 27-ին մենք եվրոպական չափանիշներով ընտրություններ անցկացրինք, երդմնակալությունը եւս եվրոպական չափանիշներով կանցկացվի: Եվրոպական երկրներում երդմնակալությունները խորհրդարանի նիստերի դահլիճում են անցկացնում: Ցավոք, Թբիլիսիում մենք այդ հնարավորությունը չունենք, ուստի որոշեցինք այն անցկացնել շենքի բակում: Դա թանկ չի լինի եւ քաղաքը կաթվածահար չի անի», – ասել է Փանջիկիձեն:
Ըստ նրա՝ հանդիսավոր արարողությանն անպայման ներկա կլինի ռազմական բաղադրիչը, բայց ծանր տեխնիկան եւ օդուժը չեն ներգրավվի, գրում է «Նովոստի Գռուզիան»:
«Նոր նախագահի երդմնակալության համար շատ ավելի քիչ գումար կծախսվի, քան նախկինում», – վստահեցրել է նախարարը:
Երդմնակալությունից անմիջապես հետո Մարգվելաշվիլին կմեկնի Հերոսների հրապարակ՝ հարգելու Վրաստանի միասնականության համար զոհվածների հիշատակը: Երեկոյան Ռուսթավելիի անվան պետական ակադեմիական թատրոնում կկայանա մեծ համերգ:
Գեորգի Մարգվելաշվիլիի երդմնակալության արարողությունը կկայանա նոյեմբերի 17-ին:
news.am