Հայաստանում կորոնավիրուսով վարակվածների թիվը հասավ 52-ի

Հայաստանում կորոնավիրուսով վարակվածների թիվը հասավ 52-ի: Այս մասին ֆեյսբուքյան լայվով հայտնեց ՀՀ Առողջապահության նախարար Արսեն Թորոսյանը:

«Մենք եւս 50 տեստ քիչ առաջ ավարտեցինք, այսօր ընդհանուր առմամբ կատարել ենք 105 տեստ եւ եւս 7 տեստի արդյունքներ դրական են: Դեպքերից 12-ը կապված են Էջմիածնի դեպքի հետ եւ որեւէ ախտանշան չեն ունեցել մինչ այս»,-ասաց նա:

Այսօր ավելի վաղ Կառավարությունն արտահերթ նիստում որոշում է կայացրել ՀՀ տարածքում արտակարգ դրություն հայտարարել:

Նախարարի խոսքով` հաստատված  52 դեպքից 12-ի մոտ ընդհանրապես ախտանշաններ չկան եւ նրանք ընդհանրապես հիվանդանոցում չեն գտնվում, այլ գտնվում են մեկուսացման վայրում եւ նույնիսկ  չեն էլ ենթադրում, թե նրանցից ում  մոտ կարող է լինի վիրուսը:

«Նրանց դեպքում մենք կկայացնենք ինդիվիդուալ մոտեցում, տեղափոխենք հիվանդանոց թե` չէ: Նրանց բացի ժամանակից ուրիշ բանի կարիք չունեն, որպեսզի վիրուսը դուրս գա նրանց օրգանիզմից: Դեպքերի մի մասը կապված է փաստորեն երեկ արտադրամասում հայտնաբերված դեպքերի հետ եւ կան մի շարք նոր դեպքեր, որոնց համճարակաբանական հետաքննությունը այս պահին ընթացքի մեջ է եւ մենք փորձում ենք  պարզել նրանց շփման շրջանակը եւ վարակման աղբյուրը»,-ասաց նախարարը:

News.am

---

---