Նինոծմինդացիները ցանկանում են, որ Կլոր լճի տարածքը բարեկարգվի

Տեղական բյուջեի միջոցներով անցկացվել են ջրատար առվակներ Նինոծմինդա քաղաքի Կլոր լճի ջրի մակարդակը բարձրացնելու համար: Նինոծմինդա քաղաքի բնակիչները ցանկանում են, որ լիճը դառնա հանգստի վայր:

Վերջերս Չարենց, Ռուսթավելի փողոցների և Նորաշեն թաղամասի բնակիչները իրականացրել էին լճի մաքրման աշխատանքներ:
Բացի այդ, անցկացվել է երկու կիլոմետր երկարությամբ ջրի առվակ և բաց թողնվել դեպի լիճ: Քաղաքի որոշ բնակիչներ դեմ են դրան և նշում են, որ լճի որոշ հարակից տարածքներ բնակիչների կողմից օգտագործվելու են որպես ցանքատարածություն:

Բնակիչներից Սոսկարի խոսքով, իրենք դեմ չեն, որ ջրի մակարդակը բարձրացվի, փոքր ձկներ լցվեն լճի մեջ, շրջակայքում ծառեր տնկվեն, հանգստի վայր կառուցվի, անցկացվի հեծանվի վազքուղի: Սոսկարը նաև նշում է, որ լճի խորությունը կազմում է 1 մետր, սակայն էկոհամակարգի լիարժեք գործունեության համար անհրաժեշտ է, որ լճի խորությունը լինի 2,5-3 մետր:

Այս պահին լճում ջուր չի լցվում: Իսկ պատշաճ ուշադրություն չդարձնելու դեպքում տեղանքը կվերածվի ճահճի: Նինոծմինդա քաղաքի բնակիչներից Սարգիս Եղոյանը նշում է, որ խորհրդային տարիներին լիճը ցանկապատված էր, շուրջը կային ծառեր, նստարաններ, գիշերային լուսավորություն, իսկ բնակիչները գալիս էին այստեղ լավ ժամանակ անցկացնելու: Նրա խոսքով, Խորհրդային Միության փլուզումից հետո ամեն ինչ փոխվեց, իսկ այսօր քաղաքի միակ հանգստյան վայրը քաղաքային զբոսայգին է, որը վատ վիճակում է, իսկ հողերի կեսն էլ բնակիչները սեփականաշնորհել են: Սարգիսը ցավ է ապրում և նշում, որ գոնե զբոսայգին բարեկարգվեր և վերադարձվեր բնակիչներին:

Հիշեցնենք, որ Կլոր լիճը գտնվում է Նինոծմինդա քաղաքի և Մեծ Խանչալի գյուղի մեջտեղում:

Նյութի մանարամասները դիտեք ֆոտոշարքում.