Օրլովկա գյուղի հողերի խնդիրը լուծվեց

Նինոծմինդայի մունիցիպալիտետի Օրլովկա գյուղի բնակիչների հողերի հարցը դրական պատասխան է ստացել:

Հունիսի 10-ին Օրլովկա գյուղի բնակիչները դիմել են Nor ռադիոյին՝ լուսաբանելու գյուղի արոտավայրերի խնդիրը:

Գյուղի բնակիչ Գաբրիել Եղոյանի խոսքով ՝ գյուղում արոտավայրերի հարցը լուծված է: Գյուղի հարևանությամբ գտնվող 16 հա հողատարածքն այժմ օգտագործվում է բնակիչների կողմից, և արդեն այդ տարածքում արածում են կովերը: Բնակիչները 1998 թվականից ի վեր չեն օգտագործել այդ պետական ​​հողը: Բայց հիմա հողը փոխանցվել է գյուղացիներին: Գոյություն ունի նաև 160 հա հողատարծք, որը նույնպես պետք է օգտագործեն գյուղացիները, բայց քանի որ քոչվորները ժամանել և վարձակալել են այն Ազատ Եղոյանից, համաձայնեցվել է, որ քոչվորների հեռանալուց հետո բոլոր բնակիչները կօգտագործեն այդ հողը, որը գտնվում է պետության հաշվեկշռում: «Եվ բոլոր գյուղացիների անունից ուզում եմ շնորհակալություն հայտնել Նինոծմինդայի մունիցիպալիտետի ղեկավարությանը, որ նրանք կարողացան լուծել մեր գյուղի արոտավայրերի խնդիրը»:

Գյուղի մեկ այլ բնակիչ Անդրանիկ Կոբելյանն էլ ավելացրեց, որ շրջանի ղեկավարության օգնությամբ լուծվել է հողի խնդիրը: «Մենք ընդհանուր կարծիքի ենք եկել, որ պետական ​​հողը պետք է օգտագործեն բոլոր գյուղացիները, և ոչ թե միայն մեկ անձ, ինչպես նախկինում»:

Ինչպես նշել են բնակիչները, նրանք արդեն սկսել են գծել գյուղի արոտավայրերի սահմանային գծերը, որպեսզի բնակիչները կարողանան առանց որևէ խնդրի անասուններին արածեցնել:

Սակրեբուլոյի նախագահ Սումբատ Կյուրեղյանը մեկնաբանեց այս խնդրի լուծումը. «Արոտավայրերը կավելանան մոտ 205 հեկտարով, և գյուղացիները կարող են օգտագործել այդ տարածքը: Տարածքի մի մասն արդեն փոխանցվել է գյուղի համայնքին՝ օգտագործման համար, իսկ մյուս մասը կփոխանցվի աշնանը »:

Նշենք, որ Օրլովկա գյուղում բնակվում է 65 ընտանիք, և անասունների համար բավարար արոտավայր չի եղել: Բնակիչները բողոքում էին, որ անասունների համար արոտավայրերի տարածքը ամեն տարի նվազում է և արդեն հնարավոր չէ զբաղվել անասնապահությամբ։

---

---