Ազգերի լիգա. Հայաստանի հավաքականի վստահ հաղթանակը

Ֆուտբոլի Հայաստանի ազգային հավաքականն առաջին հաղթանակը տարավ Ազգերի լիգայի C դիվիզիոնի երկրորդ խմբում:

Երկրորդ տուրում հայկական թիմը Երևանի Վազգեն Սարգսյանի անվան «Հանրապետական» ստադիոնում ընդունեց Էստոնիայի հավաքականին և վստահ հաղթանակ տարավ 2:0 հաշվով: Դա իսպանացի անվանի մասնագետ Խոակին Կապառոսի առաջին հաղթանակն էր Հայաստանի հավաքականի գլխավոր մարզիչի պաշտոնում:

Մակեդոնացիների դեմ նախորդ խաղի համեմատ Խոակին Կապառոսը մեկնարկային կազմում կատարել էր 3 փոփոխություն՝ Կամո Հովհաննիսյանի, Խորեն Բայրամյանի ու Սերոբ Գրիգորյանի փոխարեն դաշտ դուրս բերելով Արման Հովհաննիսյանին, Գեղամ Կադիմյանին և Տիգրան Բարսեղյանին:

Էստոնիայի հավաքականն ակտիվ սկսեց խաղը, սակայն մեկնարկային ճնշումը հաղթահարելուց հետո Հայաստանի հավաքականը սկսեց խաղալ առաջին համարով: Խաղի սկզբնամասն անցնում էր կոշտ պայքարում՝ առանց գոլային պահերի: Հայաստանի հավաքականն ավելի հաճախ էր փորձում գրոհներ կազմակերպել, բայց մրցակիցը հաջող էր գործում պաշտպանությունում: Առաջին խաղակեսում 2 թիմերի դարպասապահները գրեթե չէին մտնում խաղի մեջ: Էստոնացիները հազվադեպ էին գրոհում, իսկ դաշտի տերերի գրոհների փորձերը չէին հասնում նպատակին: Հայաստանի հավաքականն առաջին քիչ թե շատ վտանգավոր պահն ունեցավ 34-րդ րոպեին, երբ ռուսական «Խիմկիի» կիսապաշտպան Արշակ Կորյանը կենտրոնով առաջ շարժվեց և տուգանային հրապարակի մատույցներից կատարեց հարված, որը շեղ ստացվեց: Թվում էր, որ թիմերը ընդմիջման են գնալու 0:0 հաշվի պայմաններում, սակայն Ալեքսանդր Կարապետյանն այլ կարծիքի էր: 44-րդ րոպեին ռուսական «Տամբովի» հարձակվողն Արշակ Կորյանի հաջող գործողություններից ու փոխանցումից հետո տպավորիչ հարվածով գրավեց հյուրերի դարպասը՝ բացելով խաղի հաշիվը: Թիմերն ընդմիջման գնացին 1:0 հաշվի ժամանակ:  

Երկրորդ խաղակեսի սկզբնամասում Հայաստանի հավաքականը կարող էր կրկնապատկել առավելությունը, սակայն բելառուսական «Նեմանի» կիսապաշտպան Գեղամ Կադիմյանը հապաղեց և կորցրեց հարվածի պահը: Երկրորդ խաղակեսի սկզբնամասում խաղն անցնում էր հավասար պայքարում: 57-րդ րոպեին Տիգրան Բարսեղյանը ստուգեց մրցակցի դարպասապահի զգոնությունը և վերջինս հետ մղեց գնդակը: Հայաստանի հավաքականը դեմ չէր երկրորդ համարով խաղալուն և ամուր պաշտպանությամբ սպասում էր իր շանսին: Էստոնացիներին չէր հաջողվում ստեղծել վտանգավոր պահեր: 64-րդ րոպեին փոխարինման դուրս եկավ Սլովակիայի «Ժիլինայի» 21-ամյա կիսապաշտպան Վահան Բիչախչյանը, որը Հայաստանի հավաքականում նորամուտը կարող էր անմիջապես նշել գոլով, սակայն դաշտ դուրս գալուց վայրկյաններ անց նա կորցրեց իրական գոլային պահ: Այնուամենայնիվ, քիչ անց գնդակը երկրորդ անգամ հայտնվեց հյուրերի դարպասում: Հեռվից կատարած տպավորիչ հարվածով Հայաստանի հավաքականի երկրորդ գոլը խփեց «Գանձասար-Կապանի» կիսապաշտպան Վբեյմար Անգուլոն, որը բացեց գոլերի հաշիվն ազգային թիմում: Երկրորդ գոլից հետո էլ դաշտի տերերն ակտիվություն էին դրսևորում առջևի գծում և ունեին վստահ տեսք: 70-րդ րոպեին Էստոնիայի հավաքականն ունեցավ իրական գոլային պահ, բայց գնդակը չհայտնվեց դարպասում: 76-րդ րոպեին Վահան Բիչախչյանը կորցրեց ևս մեկ գոլային պահ՝ կատարելով շեղ հարված: Հայաստանի հավաքականը մրցակցին թելադրում էր իր խաղը և վտանգավոր գործում հատկապես հակագրոհելիս: 79-րդ րոպեին գոլ խփելուն մոտ էր Տիգրան Բարսեղյանը, որի հարվածից հետո գնդակն ընթացավ փոքր շեղությամբ: Խաղի վերջնամասում էստոնացիներն ակտիվացել էին և փորձում էին կրճատել հաշիվը, սակայն դա Հայաստանի հավաքականին չխանգարեց հանդիպումը հասցնել հաղթական ավարտի:

Խմբի մյուս խաղում Վրաստանի և Հյուսիսային Մակեդոնիայի հավաքականները խաղաղությամբ բաժանվեցին Թբիլիսիում՝ 1:1: Երկրորդ տուրից հետո Հյուսիսային Մակեդոնիան ու Վրաստանն ունեն 4-ական միավոր, Հայաստանը՝ 3, իսկ էստոնացիները միավոր չեն վաստակել:  

Ազգերի լիգայում Հայաստանի հավաքականը հաջորդ հանդիպումը կանցկացնի հոկտեմբերի 8-ին՝ ընդունելով Վրաստանի հավաքականին:

Ազգերի լիգա, երկրորդ տուր

C դիվիզիոն, երկրորդ խումբ

Հայաստան – Էստոնիա՝ 2:0

Ալեքսանդր Կարապետյան, 44, Վբեյմար Անգուլո, 65

Հայաստան. Դավիդ Յուրչենկո, Հովհաննես Համբարձումյան, Վարազդատ Հարոյան, Անդրե Կալիսիր (Տարոն Ոսկանյան, 46), Արման Հովհաննիսյան, Արտակ Գրիգորյան, Վբեյմար Անգուլո, Գեղամ Կադիմյան (Խորեն Բայրամյան, 73), Արշակ Կորյան (Վահան Բիչախչյան, 64), Տիգրան Բարսեղյան, Ալեքսանդր Կարապետյան: sport.news.am

---

---