Երևանում բողոքի ցույց է ընթանում Նիկոլ Փաշինյանի հրաժարականի պահանջով

Երևանում ընթանում է Հայաստանի վարչապետ Նիկոլ Փաշինյանի հրաժարականի պահանջով բողոքի ցույց: Ցուցարարները հավաքվել են կառավարության տան դիմաց, որտեղ ուժեղացված են անվտանգության միջոցները:

Ընդդիմադիր 17 կուսակցության հիմնադրած «Հայրենիքի փրկության շարժումը» դեկտեմբերի 22-ը հայտարարեց համընդհանուր գործադուլի օր:

Հայաստանում Նիկոլ Փաշինյանի հրաժարականի պահանջով բողոքի ցույցեր են ընթանում նոյեմբերի 10-ից: Քաղաքացիների մի մասը Փաշինյանի հրաժարականն է պահանջում Լեռնային Ղարաբաղի հակամարտության հարցով Ադրբեջանի հետ Մոսկվայի միջնորդությամբ կնքված պայմանագրի պատճառով:

ՀՀ վարչապետ Նիկոլ Փաշինյանն էլ ֆեյսբուքյան իր էջում գրառում է արել՝ անդրադառնալով ՀՀ-ի ներքաղաքական վիճակին:

Նա, մասնավորապես, նշել է.

«Երկրում հաստատված քաղաքական իրավիճակի նկարագրությունը հետեւյալն է.

1. 2018 թվականի հեղափոխության արդյունքում Հայաստանում իշխանությունից զրկված «էլիտան» փորձում է հասնել ռեւանշի: Ընդ որում՝ խոսքն ամենեւին միայն քաղաքական «էլիտայի» մասին չէ, այլ բոլոր նրանց, ովքեր մինչեւ 2018 թվականը ունեցել են արտոնություններ, 2018 թվականից հետո՝ չունեն:

2. Ժողովուրդը, որ 2018 թվականի հեղափոխությունից հետո զգացել է իր իշխանություն լինելու հանգամանքը, չի ուզում կորցնել այդ կարգավիճակը, մանավանդ հիմա, երբ օգտվելով հանգամանքից, որ իշխանությունն առավել կենտրոնացած է արտաքին անվտանգության խնդիրների սպասարկմամբ, ոմանք գործի են դրել «եթե հանրահավաքի չգաս, աշխատանքից կազատվես» տրամաբանությունը:

Այսպիսով՝ իրական հակադրությունը ոչ թե կառավարության եւ ընդդիմության միջեւ է, այլ 2018 թվականին արտոնություններից զրկված «էլիտայի» եւ ժողովրդի: Բայց բոլոր դեպքերում վճռորոշ խոսքը ասելու է ժողովուրդը, որովհետեւ եթե ժողովուրդը իր խոսքն ասի՝ «էլիտաները» ոչինչ անել չեն կարող:

Ես իհարկե, ամեն ինչ անելու եմ, որ ժողովուրդը իր խոսքն ասելու հնարավորությունը չկորցնի եւ ասի այդ խոսքը: Բայց այս պահին մեզ համար առաջնահերթությունը Հայաստանի եւ Արցախի արտաքին անվտանգության ապահովումն է եւ նշված գործողություններում արտաքին անվտանգությունը որեւէ կերպ չպետք է հարցականի տակ դրվի:

---

---