Հնդկաստանում «ձկան թեփուկներով» երեխա է ծնվել
Հնդկական Նագպուր քաղաքում անսովոր կերպով հաստ եւ կոշտ, ձկան թեփուկներ հիշեցնող մաշկով աղջիկ է ծնվել:
Խորը ճաքերով սպիտակ շերտը ծածկում է նրա ամբողջ մարմինը: Գենետիկական խանգարումը, որով նա ծնվել է, կոչվում է առլեկինի իխտիոզ:
Ֆերմերների երիտասարդ ընտանիքի աղջիկը ժամանակից շուտ է ծնվել, այդ պատճառով նրա մոտ, բնածին լուրջ հիվանդությունից բացի, դիտարկվում է որոշ օրգանների անհասություն. ձեռքերի եւ ոտքերի մատները հազիվ են ձեւավորված, լիարժեք քթի փոխարեն երկու անցք է, ականջները բացակայում են, կոպերը շրջված են, իսկ բերանը ձկան բերան է հիշեցնում: Քանի որ մաշկի եղջերացումները թեփուկների են նման, հիվանդությունը կոչել են իխտիոզ կամ «ձկան թեփուկների համախտանիշ»:
Ներկայումս նրա մաշկի նմուշները հանձնել են Սալվայում գտնվող Բժշկական գիտությունների ինստիտուտ ՀՁ. անալիզների շարքը թույլ կտա մոտ ժամանակներս պարզել նրա առողջական վիճակը: Իսկ առայժմ աղջիկը նորածինների ինտենսիվ թերապիայի բաժանմունքում է:
«Նման երեխաները վարակների հակում ունեն եւ հաճախ մահանում են փոքր հասակում: Նրա մաշկն անընդհատ վազելինով խոնավեցնում են: Այս պահին մենք նույնիսկ վստահ չենք, թե նա ակնախնձորներ ունի: Կանխատեսումներ էլ չենք անում», – այս հազվագյուտ դեպքը մեկնաբանել է մանկաբույժ Յաշ Բանաիտը:
Ծնված աղջիկը 23-ամյա կնոջ եւ նրա 27-ամյա ամուսնու առաջին երեխան է: Ընտանիքն աղքատության մեջ է ապրում գյուղում, այդ պատճառով կինը հղիության ընթացքում ոչ մի անգամ բժշկի չի գնացել: Առլեկինի իխտիոզը հնարավոր է հայտնաբերել արդեն հղիության չորրորդ ամսում:
Բժիշկների խոսքով, սա Հնդկաստանում առլեկինի իխտիոզով ծնված առաջին երեխան է: Այդ երկրում նման դեպքի մասին հաղորդվել էր նաեւ 2014-ին, սակայն այդ անգամ նորածինը մահացել էր, մինչեւ բժիշկները կհասցնեին զննել նրան եւ ախտորոշում կատարել:
Տվյալ խանգարմամբ առաջին մարդը, որի մասին տեղեկություն է պահպանվել, ծնվել է 1750 թվականին:
NEWS.am Medicine