Զատիկից մեկ շաբաթ առաջ հայտնի կդառնա, թե ինչ սահմանափակումներ են կիրառվելու Վրաստանում

Զատիկից մեկ շաբաթ առաջ Վրաստանի քաղաքացիները կիմանան կառավարության ծրագրերի մասին. Կլինե՞ն սահմանափակումներ կորոնավիրուսի տարածման հետ կապված, թե ոչ, այսօր լրագրողներին ասել է Առողջապահության նախարար Էկատերինե Տիկարաձեն:

Նրա խոսքով, կառավարության համար կարևոր է հնարավորինս պահպանել տնտեսական գործունեությունը երկրում: Այդ նպատակով աշխատանքի տեսչությունն ինտենսիվորեն աշխատում է:

«Հաստատված կանոնների պահպանումը քաղաքացիների կողմից մեծ կարևորություն ունի, որպեսզի մեզ չստիպեն որոշակի սահմանափակումներ մտցնել: Այս փուլում մենք ունենք ռեսուրս, որպեսզի կրկին չդիմենք փակմանը: Սակայն յուրաքանչյուր քաղաքացու բարձր սոցիալական պատասխանատվությունը կարեւոր է », – ասել է Տիկարաձեն:

Վրաց փորձագետները հիասթափեցնող կանխատեսումներ են անում: Նրանք կարծում են, որ երկիրը մտնում է կորոնավիրուսի տարածման երրորդ փուլ և չեն բացառում, որ Վրաստանը կմոտենա նոյեմբեր-դեկտեմբեր ամիսների ցուցանիշներին, երբ օրական հայտնաբերվում էր մի քանի հազար վարակ:

Ըստ համաճարակաբանների, երկրում նախորդ շաբաթների համեմատ, դիմակների կրման մակարդակը 43% -ից հասել է 51% -ի: Փորձագետները մեկ անգամ ևս հորդորում են քաղաքացիներին դիմակ կրել, պահպանել սոցիալական հեռավորությունը և պատվաստվել:

Վրացական կլինիկաների տնօրենները խոսում են նաև իրավիճակի վատթարացման մասին:

Վերջին մեկ օրվա ընթացքում Վրաստանում հայտնաբերվել է կորոնավիրուսի 228 նոր դեպք: Ամենամեծ թիվը գրանցվել է Թբիլիսիում, Գուրիայի, Սամեգրելո – Զեմո Սվանեթիի և Աջարիայի մարզերում:

Համաճարակի սկզբից Վրաստանում արձանագրվել է կորոնավիրուսի ավելի քան 284 հազար դեպք, վերականգնվել է ավելի քան 275 հազար, մահացել է 3822 հիվանդ:

Վրաստանում կորոնավիրուսի առաջին դեպքը հայտնաբերվել է 2020 թվականի փետրվարի 26-ին: