Վրաստանի և Հայաստանի վարչապետները քննարկել են Դարիալի կիրճում հեղեղումների հետևանքով ստեղծված իրավիճակը

Tert.am-ի հետ զրույցում ՀՀ վարչապետի մամուլի խոսնակ Գոհար Պողոսյանը հայտնել է, որ Հայաստանի Հանրապետության վարչապետ Հովիկ Աբրահամյանի նախաձեռնությամբ հուլիսի 4-ին հեռախոսազրույց է տեղի ունեցել Վրաստանի վարչապետ Գիորգի Կվիրիկաշվիլիի հետ:

Նրա խոսքով՝ երկու երկրների վարչապետները քննարկել են Դարիալի կիրճում հեղեղումների հետևանքով ստեղծված իրավիճակի ու այնտեղ իրականացվող աշխատանքների ընթացքին առնչվող մի շարք հարցեր:

Հայաստանի վարչապետ Հովիկ Աբրահամյանը շնորհակալություն է հայտնել Գիորգի Կվիրիկաշվիլուն՝ Դարիալի կիրճում իրականացվող լայնածավալ աշխատանքի, ինչպես նաև՝ հեղեղի հետևանքով ստեղծված դժվարությունների հարցում Հայաստանի քաղաքացիներին աջակցելու համար:

Վրաստանի վարչապետ Կվիրիկաշվիլին նշել է, որ վրացական կողմը ջանքեր է գործադրում Դարիալի կիրճում մեքենաների 24 ժամյա երթևեկությունը վերականգնելու համար, որի համար նախնական տվյալներով մոտ 5 օր կպահանջվի:

Երկու երկրների վարչապետները անդրադարձել են նաև երկկողմ հետաքրքրություն ներկայացնող այլ հարցերի:

---

---