Եվրո-2016-ի եզրափակիչը՝ Պորտուգալիա – Ֆրանսիա
Ֆրանսիայում անցկացվող ֆուտբոլի Եվրոպայի առաջնության եզրափակիչում կհանդիպեն Պորտուգալիայի և Ֆրանսիայի հավաքականները։
Դա պարզ դարձավ հինգշաբթի ուշ երեկոյան Մարսելում կայացած երկրորդ կիսաեզրափակիչ հանդիպումից հետո, որում տանտերերը 2:0 հաշվով առավելության հասան աշխարհի գործող չեմպիոն Գերմանիայի հավաքականի նկատմամբ։ Երկու գոլերն էլ խփեց Անտուան Գրիզմանը՝ առաջին խաղակեսին ավելացված րոպեներին՝ 11-մետրանոց տուգանային հարվածով, և 72-րդ րոպեին։
Նախօրեին Լիոնում կայացած առաջին կիսաեզրափակիչում, հիշեցնենք, Պորտուգալիայի հավաքականը նույն հաշվով հաղթեց Ուելսի թիմին։
Եվրո-2016-ի եզրափակիչ հանդիպումը տեղի կունենա հուլիսի 10-ին Փարիզի Սեն Դենի արվարձանի Ստադ դը Ֆրանս մարզադաշտում։
www.azatutyun.am