Ռուս օդաչուները Չուդովո քաղաքի մոտակայքում ՉԹՕ են արձանագրել. ՏԵՍԱՆՅՈւԹ

Նովգորոդի մարզի երկնքում թռչող ռուսական մի քանի ինքնաթիռների օդաչուները հայտնել են չբացահայտված թռչող օբյեկտի մասին։ Տեղեկությունը հաղորդում է Ren TV հեռուստաալիքը:

Լրատվամիջոցի տվյալներով՝ մայիսի 25-ին ինքնաթիռների անձնակազմները «Պուլկովո» օդանավակայանի թռիչքների ղեկավարին հաղորդել են, որ իրենց լոկատորներում անհայտ օբյեկտի նշան է նկատվում: Այդ պահին օդանավերը գտնվել են Չուդովո քաղաքի մոտակայքում։

Վերջին ամիսներին ՉԹՕ-ների թեման ակտիվորեն շրջանառվում է ամերիկյան ԶԼՄ-ներում։ Ավելի քան մեկ ամիս առաջ Պենտագոնից հայտարարություն էր հնչել, որ ՉԹՕ-ների վերաբերյալ նյութերը գաղտնազերծվելու են այս տարվա ամռանը:

2020 թվականի ապրիլի վերջին Պենտագոնն իր կայքում հրապարակել էր տեսագրություններ, որոնցում «անհայտ երևույթներ» էին պատկերված: Գերատեսչության տվյալներով ՝ ԱՄՆ ռազմածովային ուժերի երեք ոչ գաղտնի տեսահոլովակներից մեկը նկարահանվել էր 2004 թվականի նոյեմբերին, մյուս երկուսը՝ 2015 թվականի հունվարին: Նրանք բոլորը 2007 և 2017 թվականներին հայտնվել էին համացանցում: Ավելի ուշ ԱՄՆ ՌԾՈւ -ն հրապարակեց մի քանի հաշվետվություններ, որոնցում օդաչուները պատմում էին 2013 թվականի հունիսի 27-ից մինչև 2019 թվականի փետրվարի 13-ը հանդիպած ՉԹՕ-ների մասին:

---

---