Նինոծմինդայի մանկատան երեխաները մեծ սթրեսի մեջ են, պաշտպանված չեն ճնշումից և հոգեբանական բռնությունից
Վրաստանի ժողովրդական պաշտպանն արձագանքում է սոցցանցում տարածված Նինոծմինդայի մանկատան շահառուների տեսագրություններին:
Ժողովրդական պաշտպանի խոսքով, տեսագրությունները ցույց են տալիս, որ հաստատության ղեկավարը ոչ միայն անտեսում է երեխաների լավագույն շահերը, այլև՝ ոտնահարում դրանք:
Պաշտպանը կոչ է անում պետական մարմիններին անհապաղ արձագանքել գիշերօթիկ դպրոցում անչափահասների իրավունքների ոտնահարման փաստին:
«Ըստ տարածված ձայնագրության, պանսիոնատի ղեկավարը երեխաների ներկայությամբ հրապարակայնորեն կապվում է որոշակի անձանց հետ, ինչպես նաև հարցնում՝ արդյոք երեխաները ցանկանում են լքել հաստատությունը: Ակնհայտ է, որ երեխաները մեծ սթրեսի մեջ են, լացում են և պաշտպանված չեն ճնշումից և հոգեբանական բռնությունից:
Վրաստանի ժողովրդական պաշտպանը շեշտում է, որ Նինոծմինդայի մանկատանը ապրող անչափահասները գտնվում են պետական խնամքի տակ, և միայն համապատասխան գերատեսչությունների ներգրավմամբ է որոշում կայացվում երեխաներին խնամքի այլ վայր տեղափոխելը՝ հաշվի առնելով նրանց լավագույն շահերը: Հաստատության ղեկավարը, որպես չարտոնված անձ, խոչընդոտում է այս գործընթացին և ոչ միայն անտեսում է երեխաների շահերը, այլև ինքն է խախտում դրանք:
Անթույլատրելի է, պետական խնամքի տակ գտնվող երեխաները վերապրեն նման վերաբերմունք և սթրես: Պետության անգործության և երեխաների կարիքների անտեսման վառ ապացույց է այն փաստը, որ այսօր հաստատության ղեկավարը հրապարակայնորեն քննարկում է երեխաների հետ կապված անձնական տվյալները, և պետությունը չի կարող փաստացի վերահսկողություն իրականացնել իր կողմից լիցենզավորված հաստատության նկատմամբ:
Վրաստանի ժողովրդական պաշտպանը կոչ է անում Վրաստանի աշխատանքի, առողջապահության և սոցիալական հարցերի նախարարությանը և Վրաստանի ներքին գործերի նախարարությանը.
Անհապաղ ապահովել հաստատությունում գտնվող անչափահասների պաշտպանությունը ճնշումից և հոգեբանական բռնությունից, կանխել նրանց լավագույն շահերի ոտնահարման փաստը,
Հետաքննություն սկսել ենթադրյալ հոգեբանական բռնության վերաբերյալ և ձեռնարկել բոլոր արդյունավետ միջոցները անչափահասների լավագույն շահերը պաշտպանելու համար,
Ապահովել անչափահասներին այլընտրանքային խնամքի տակ պահելու գործընթացի շարունակությունն ու այն անհապաղ ավարտին հասցնել բոլոր անչափահասների համար», – ասված է ժողովրդական պաշտպանի հայտարարության մեջ:
