Սաուդյան Արաբիայում թույլ կտան չամուսնացած, ամուսնալուծված կամ այրի կանանց ապրել առանց տղամարդու

Սաուդյան Արաբիայի իշխանությունները թույլ կտան չամուսնացած, ամուսնալուծված կամ այրի կանանց ապրել միայնակ առանց մտերիմ ազգական տղամարդկանց համաձայնության, որոնք սովորաբար նրանց խնամակալներն են՝ ըստ իսլամական օրենսդրության, հաղորդում է MEM-ը:

Թագավորության ծայրահեղ պահպանողական դատական մարմինները չեղարկել են շարիաթի դատարանների դատական օրենսգրքի 169-րդ հոդվածի կետը: Փոփոխությունը թույլ կտա միայնակ կանանց առանձին ապրել: «Չափահաս կինն իրավունք ունի ընտրելու՝ որտեղ ապրել»,-ասված է փաստաթղթում:

«Կնոջ խնամակալը կարող է հայտնել նրա մասին միայն այն դեպքում, եթե ունի ապացույցներ, որ նա կատարել է հանցագործություն»:

Դեռ ավելին, եթե կինն ազատազրկված է, նա չի փոխանցվի իր խնամակալին պատիժը կրելուց հետո: Փաստաբան Նաիֆ Ալ Մանսիի խոսքով՝ ընտանիքներն այլեւս չեն կարողանա հայց ներկայացնել ընդդեմ իրենց դուստրերի, որոնք նախընտրում են միայնակ ապրել»:

Ավելի վաղ այս տարի Սաուդյան Արաբիան թույլ է տվել 18 տարին լրացած կանանց փոխել իրենց անունն անձը հաստատող փաստաթղթում առանց խնամակալի համաձայնության: Իշխանությունները նաեւ չեղարկել են սաուդցի կանանց համար ուղեւորությունների սահմանափակումները, երբ 21 տարին լրացած կանանց թույլատրվում է դիմում ներկայացնել անձնագիր ստանալու եւ ազատ տեղաշարժման համար:

Սաուդցի կանանց նաեւ թույլատրել են մեքենա վարել:

Այդ իրավական փոփոխությունները թագաժառանգ Մոհամեդ բին Սալմանի «2030 հեռանկարներ» նախաձեռնության մասն են կազմում, որն ուղղված է տնտեսության դիվերսիֆիկացմանն ու Թագավորությունը «դեպի առավել չափավոր իսլամն» ուղղելը:

---

---