Տղամարդկանց համար ճարպակալումն ավելի վտանգավոր է, քան կանանց
Տղամարդկանց համար ճարպակալումը երեք անգամ ավելի վտանգավոր եւ մահաբեր է, քան կանանց համար, զգուշացնում են University of Oxford-ի գիտնականները:
189 երկրից 4 մլն մարդու մասնակցությամբ հետազոտությունը, որը հրապարակվել է The Lancet ամսագրում, ցույց է տվել, որ նորմալ քաշով տղամարդկանց 19 տոկոսը, իսկ կանանց 11 տոկոսը մինչեւ 70 տարի չի ապրում: Ճարպակալմամբ մարդկանց շրջանում, սակայն, ցուցանիշներն այլ են. մինչեւ 70 տարեկանը մահվան ռիսկը ճարպակալմամբ տղամարդկանց շրջանում մեծանում է մինչեւ 30 տոկոս, իսկ կանանց շրջանում` մինչեւ 15 տոկոս:
Հետազոտության հեղինակ Ռիչարդ Պետոն University of Oxford-ից նշել է, որ ճարպակալումը ԱՄՆ-ում վաղաժամ մահերի երկրորդ պատճառն է (ծխելուց հետո): Սակայն քաշի 10 տոկոսով նվազումը կարող է վաղաժամ մահվան ռիսկը կանանց մոտ նվազեցնել 10 տոկոսով, իսկ տղամարդկանց մոտ` 20 տոկոսով:
Առայժմ հետազոտողներին չի հաջողվել հասկանալ, թե ավելորդ քաշն ինչու է ավելի կործանարար տղամարդկանց համար, քան կանանց: Նախորդ հետազոտություններից մեկում ցույց էր տրվել, որ տղամարդկանց մոտ դիաբետի եւ կաթվածակայունության ռիսկն ավելի բարձր է, քան կանանց մոտ: Դա գուցե ազդում է նաեւ կյանքի տեւողության վրա:
Իմիջիայլոց, ավելորդ կգ-ներից ազատումը օգտակար է երկու սեռին էլ, նշում են գիտնականները: Հետաքրքիր է սակայն, որ քաշի պակասը եւս նույնանում է վաղաժամ մահվան բարձր ռիսկի հետ, այդ պատճառով գիտնականները խորհուրդ են տալիս քաշը նորմայի սահմաններում պահել:
Առողջապահության համաշխարհային կազմակերպության փորձագետների կարծիքով աշխարհում ճարպակալման տարածումը համաճարակի բնույթ է ստանում: Այս տարի ԱՀԿ-ն հաղորդել է, որ մոլորակում ապրող գեր մարդկանց թիվն առաջին անգամ գերազանցել է նիհարների թիվը: Բազմաթիվ հետազոտություններն արդեն հաստատել են, որ ավելորդ քաշը կարող է սրտի հետ կապված խնդիրներ առաջացնել, դիաբետի, ինչպես նաեւ քաղցկեղային հիվանդությունների պատճառ դառնալ:
NEWS.am Medicine