Էրդողանը չի բացառել մի քանի հազար ձերբակալվածի նկատմամբ մահվան դատավճռի կայացումը
Թուրքիայի նախագահ Ռեջեփ Թայիփ Էրդողանը չի բացառել, որ երկրում իրականացված պետական հեղաշրջման փորձի հետ կապված մի քանի հազար մարդու նկատմամբ մահվան դատավճիռ կկայացվի:
Այս մասին գրում է NEWS.am-ը` հղում անելով Էրդողանի CNN-ին տված հարցազրույցին:
Նրա խոսքով՝ ակնհայտ հանցագործություն է կատարվել՝ դավաճանություն: «Պահանջները չեն կարող մերժվել ձեր սեփական կառավարության կողմից»,- ասել է նա:
Էրդողանը նշել է, որ մահապատժի վերականգնման համար խորհրդարանի որոշումն է անհրաժեշտ՝ համապատասխան սահմանադրական միջոցներ ձեռնարկելու համար. «Եթե խորհրդարանը նման որոշում կայացնի, ապա ես, որպես նախագահ, հավանության կարժանացնեմ այն»:
Մեկնաբանելով պետական հեղաշրջման մասնակիցների նկատմամբ մահապատժի իրականացման մասին ամբոխի պահանջները՝ Էրդողանն ասել է. «Ինչո՞ւ մենք պետք է տարիներ շարունակ նրանց բանտում պահենք եւ կերակրենք: Դա ժողովուրդն է ասում: Նրանք կորցրել են հարազատներին: Մարդիկ տառապում են, մենք պետք է շատ զգույշ գործենք»: