Վրաստանը Ռուսաստանի հետ հարաբերություններում վարում է պրագմատիկ ու հավասարակշիռ քաղաքականություն. Կվիրիկաշվիլի
News Georgia լրատվական գործակալության փոխանցմամբ՝ Վրաստանի վարչապետ Գեորգի Կվիրիկաշվիլին հայտարարել է Ռուսաստանի հանդեպ պրագմատիկ ու հավասարակշիռ քաղաքականության անհրաժեշտության մասին՝ չնայած երկրի տարածքային ամբողջականության հետ կապված խնդիրներին:
Կվիրիկաշվիլին այս մասին հայտարարել է արտերկրում Վրաստանի դիվանագիտական ներկայացուցչությունների ղեկավարների հետ հանդիպման բացման ժամանակ:
«Անկասկած է, որ առաջընթացի ու ձեռքբերումների մասին խոսելն անհնար է այն ֆոնին, երբ օկուպացված է մեր երկրի 20 տոկոսը, երբ հարևան երկիրը փաստացիորեն բռնակցում է մեր շրջանները:
Չնայած դրան՝ Ռուսաստանի հանդեպ Վրաստանի իշխանությունների պրագմատիկ ու հավասարակշիռ քաղաքականությունը արդյունք է տվել, երկիրը կարողացել է անդադար սադրանքների պայմաններում խուսափել պատերազմից ու դիմակայությունից:
Վրաստանը կանի ամեն բան, որպեսզի եվրոպական կառույցներից Վրաստանի ինտեգրումից ստացված օգուտները մատչելի լինեն նաև երկրի օկուպացված շրջանների բնակիչների համար»,- ասել է Վրաստանի վարչապետը: