Ցագերիում կրակել են Գախարիայի կուսակցության քաղաքապետի թեկնածուի մեքենայի վրա
Այսօր առավոտյան երկրի հյուսիսում կրակել են Գախարիայի «Հանուն Վրաստանի» կուսակցությունից Ցագերիի մունիցիպալիտետի քաղաքապետի թեկնածու, Բեսարիոն Բենդելիանիի մեքենայի վրա:
Այս մասին այսօր կայացած ճեպազրույցում ասել է կուսակցության առաջնորդներից մեկը՝ Նաթիա Մեզվրիշվիլին:
Միջադեպը տեղի է ունեցել այսօր առավոտյան Ցագերի շրջկենտրոնում (Ռաչա-Լեչխումի և Ստորին Սվանեթի):
Կրակոցների հետեւանքով ոչ ոք չի տուժել:
Կուսակցությունում, որը ստեղծվել է նախկին վարչապետ Գեորգի Գախարիայի կողմից, վստահ են, որ միջադեպը կապված է բացառապես Բենդելիանիի քաղաքական գործունեության հետ: Գախարիայի թիմում տեղի ունեցած միջադեպի պատասխանատվությունը բարդվել է իշխող «Վրացական երազանքի» վրա:
«Դրա համար պատասխանատվությունն ամբողջությամբ ընկած է «երազանքի» ղեկավարության՝ Կոբախիձեի, Կալաձեի, Ղարիբաշվիլիի վրա, ովքեր պարբերաբար արդարացնում են բռնությունը և խրախուսում ատելության խոսքը: Բնականաբար, դրա պատասխանատվությունը կրում են նաև ներքին գործերի նախարար Վախթանգ Գոմելաուրին, գլխավոր դատախազ Շոթաձեն, ովքեր չեն արձագանքում համակարգային հանցագործություններին», – ասել է Մեզվրիշվիլին:
Նրա խոսքով, այժմ «ընթանում են քննչական գործողություններ» դեպքի վայրում: Վրաստանի ներքին գործերի նախարարությունը դեռևս որևէ մեկնաբանություն չի տվել Ցագերիում տեղի ունեցած հրաձգության վերաբերյալ: