Վրաստանի պաշտպանության նոր նախարարը կուսումնասիրի պարտադիր զորակոչի վերացման հարցը
News Georgia լրատվական գործակալության փոխանցմամբ՝ Վրաստանի պաշտպանության նոր նախարար Լևան Իզորիան մտադիր է ուսումնասիրել իր նախորդի՝ Թինատին Խիդաշելիի կայացրած այն որոշումը, որն առնչվում է պարտադիր զինծառայության չեղարկմանը:
Իզորիան հայտարարել է, որ այդ հարցում չունի նախապաշարմունքներ, և որ ծրագրում է ուսումնասիրել հարցը, ինչի համար անհրաժեշտ է որոշակի ժամանակ:
Նա խոստացել է, որ մամուլն առաջինը կիմանա զորակոչի վերաբերյալ իր վերջնական որոշման մասին: Իզորիան հավելել է, որ մոտ ժամանակներս հասարակությանը կներկայացնի երկրի պաշտպանունակության բարձրացման համար գործողությունների քառամյա ծրագիր:
Վրաստանի պաշտպանության նախկին նախարար Խիդաշելին պարտադիր զորակոչի վերացման մասին հրամանը ստորագրել է այս տարվա հունիսին: Վրաստանում պարտադիր զինծառայության են զորակոչում 18-27 տարեկաններին: Պարտադիր զինծառայության ժամկետը 12 ամիս է:
www.1in.am