Հունվարի 1-ից ուժի մեջ կմտնեն նոր տուգանքներ՝ մեքենաներում ծխելու համար
Հունվարի 1-ից Վրաստանում ուժի մեջ կմտնեն նոր տույժեր տաքսու վարորդների համար՝ մեքենա վարելիս ծխելու, ինչպես նաև մեքենայում երեխաների ներկայությամբ ծխողների համար։ համապատասխան փոփոխությունները կատարվել են Վարչական իրավախախտումների օրենսգրքում։
Վրաստանի խորհրդարանի կողմից քննարկվող փոփոխությունների համաձայն՝ տաքսու վարորդները հավասարեցվում են հասարակական տրանսպորտի վարորդներին, իսկ տաքսու ուղևորներիը՝ հասարակական տրանսպորտի ուղևորներին, իսկ ծխելու համար տուգանքը նրանց համար կկազմի 200 լարի։
Սեփական մեքենաների վարորդներին 50 լարի տուգանք է սպառնում երեխաների ներկայությամբ մեքենայում ծխելու համար։
Բացի այդ, փոփոխությունների ընդունումից հետո 500 լարիով կտուգանվեն այն խանութները, որոնք ծխախոտ և ծխախոտային արտադրանք կվաճառեն դպրոցներից, մասնագիտական ուսումնարաններից և բուհերից 50 մ շառավղով։
Օրենքի կրկնակի խախտման դեպքում տուգանքները կկրկնապատկվեն.
Վրաստանում հակածխախոտային օրենսդրությունն ուժի մեջ է մտել 2017 թվականի մայիսին։ Այսօր Վրաստանում ծխելն արգելված է գրեթե բոլոր հասարակական վայրերում։ Բացառություն են կազմում խաղատները և որոշ խաղային ավտոմատ սրահներ, հատուկ սարքավորված վայրեր համալսարանների և բժշկական հաստատությունների տարածքներում։ Հնարավոր է նաեւ, որ դերասանները ներկայացման ժամանակ ծխեն, եթե դա պահանջում է ռեժիսորի մտահաղացումը։
Այսօր Վրաստանում ծխախոտի գները սկսվում են 5,5 լարիից։ Համեմատության համար նշենք, որ 2017 թվականին Վրաստանում ծխախոտի մեկ տուփն արժեր 1,5 լարիից։
