Ինչպիսին է վրացերեն լեզվի իմացության մակարդակը Նինոծմինդայի շրջանում

NOR ռադիոկայանը փորձել է, պարզել, թե ինչ մակարդակի վրա է գտնվում պետական լեզվի իմացությունը Նինոծմինդայի մունիցիպալտետում և ինչպես է ազդել Covid 19 -ը պետական լեզվի դասավանդման գործընթացի վրա։

Մեր նյութի հերոսներից մեկը, Անզոր Մալխասյանը 21 տարեկան է, ծնվել եւ ապրում է Նինոծմինդայի շրջանի Հեշտիա գյուղում: Դպրոցն ավարտելուց հետո ընդունվել է Թբիլիսիի Իլիա Ճավճավաձեի անվան պետական համալսարանը եւ ներկա պահին 2 -րդ կուրսի ուսանող է:

Մեր այն հարցին թե ինչպիսի՞ն է վրացերենի իմացության մակարդակը Նինոծմինդայի ուսանողների շրջանում, Մալխասյանը ասաց. «Իմ կարծիքով վրացերենի իմացության մակարդակը Նինոծմինդայի շրջանում բարձր է, քանի որ ներկա պահին գործում են բազմաթիվ ծրագրեր եւ երիտասարդների մեծ մասը մասնակցում է դրանց: Իսկ նախկինում երբ ես ընդունվեցի շատ դժվար էր: Ինչպես նաեւ միմյանց հետ հաղորդակցությունն էր քիչ, որովհետեւ ամաչում էինք վրացերեն խոսել, մտածելով սխալ արտահայտվելու մասին»:

Անզոր Մալխասյանի խոսքով՝ հեռավար ուսուցումը նույնպես իր բացասական ազդեցությունն է ունեցել ուսման եւ լեզվի իմացության մակարդակի բարելավման վրա:

Բեռնիկ Հովսեփյանի կյանքը ամբողջովին կապված է Նինոծմինդայի շրջանի Հեշտիա գյուղի Վիկտոր Հովսեփյանի անվան թիվ 1 հանրային դպրոցի հետ: 2000 թվականին ավարտելով դպրոցը ընդունվել է Թբիլիսիի Սուլխան-Սաբա Օրբելիանիի անվան պետական մանկավարժական համալսարանի բանասիրական բաժինը: 2005 թվականից դպրոցում աշխատել է որպես վրաց լեզվի ուսուցչուհի, իսկ 2008 թվականին Հովսեփյանը նշանակվել է դպրոցի տնօրեն:

Հարցին, թե ինչպիսի՞ն էր վրացերենի իմացության մակարդակը նախկինում եւ հիմա, ինչքանով է փոխվել, Հովսեփյանը ասաց. «Իմ սովորելու տարիներին կրթական համակարգը այդքան էլ լավ զարգացած չեր, դասագրքերը նույնպես ուրիշ էին համեմատելով թեկուզ ներկայիս վրաց լեզվի գրքերի հետ: Այն ժամանակ դասաժամերը քիչ էր, իսկ հիմա երեխաները ամեն օր անցնում են: Դպրոցում ունենք տարբեր ծրագրեր եւ խմբակներ որտեղ փորձում ենք ժամանակակից բոլոր մեթոդները օգտագործել, որպեսզի թե լեզվի իմացության եւ թե ընդհանուր դպրոցի մակարդակը ավելի բարձրանա»:

11 -րդ դասարանի աշակերտուհի Սուսաննա Անտոնյանը վրաց լեզուն սովորում է առաջին դասարանից: Նրա խոսքով՝ խոսելուց չի դժվարանում միայն վախենում է քերական սխալներ կատարել:

Ապագայում ի՞նչ մասնագիտություն է ընտրելու եւ լեզվի իմացությունը կնպաստի պահանջված մասնագետ դառնալուն թե ոչ, Սուսաննա Անտոնյանը պատասխանեց. «Լեզվի իմացությունը իմ մասնագիտության ընտրության հարցում կարեւոր գրավականն է, այլ մասնագիտություն առանց վրացերենի հնարավոր է պատկերացնել, իսկ ուսուցչի դեպքում դա անհանար է»:

Գայանե Մարիկյանը տնային տնտեսուհի է, նա 55 տարեկան է, ապրելով Ջավախքում եւ լինելով Վրաստանի քաղաքացի պետական լեզվին լավ չտիրապետելու պատճառով հաճախ է բախվում տարբեր տեսակի խնդիրների հետ:

«Ես ավարտել եմ հայկական դպրոց եւ մեր ժամանակ այդքան էլ պարտադիր չէր իմանալ վրացերենը: Իմ ժամանակաշրջանում ավելի հասանելի էր ռուսաց լեզուն: Իսկ հիմա վրացերենի հարցով եթե խնդիր է լինում երեխաներն են օգնության հասնում»,- նշեց նա:

Մանրամասները՝ աուդիոձայնագրությունում.

Համաձայն գործող օրենքի, Վրաստանի ողջ տարածքի պաստառները պետք է լինեն պետական ​​լեզվով, այնուհետեւ այն լեզուները որը կնախատեսի սեփականատերը:

Արդեն 2 տարուց ավել է նոր օրենքի համաձայն, Նինոծմինդա քաղաքում խանութների, սրճարանների եւ գործող այլ օբիեկտների գովազդային ցուցանակները նույնպես ամբողջովին փոխվել են:

Ձեզ ենք ներկայացնում պաստառների լուսանկարները Նինոծմինդա քաղաքից:

Նշենք նաեւ, որ Նինոծմինդայի Զուրաբ Ժվանիայի անվան դպրոցի տվյալներով մունիցիպալիտետում վրաց լեզվի իմացության զարգացման մակարդակը բարելավվում է։ Ժվանիայի անվան դպրոցի պետական ​​լեզվի ուսուցման և ինտեգրման ծրագրից 2014 թվականից օգտվել է 2812 շահառու։

---

---