Վրաստանում հնարավո՞ր է սննդի պակասություն. փորձագետի պարզաբանում
Վրաստանում որոշակի ապրանքների պակաս չկա, սակայն որոշ ապրանքների գները կարող են աճել՝ հաշվի առնելով համաշխարհային շուկայի միտումները։ Այս մասին Imedi LIVE հաղորդման ժամանակ ասել է տնտեսական հարցերով փորձագետ, պրոֆեսոր Լադո Պապավան։
«Ընդհանուր առմամբ, շուկայական տնտեսության մեջ սակավություն հասկացություն չկա… Ինչի պահանջարկն աճում է, դրա արժեքը նույնպես մեծանում է: Այսինքն, դուք միշտ կարող եք գնել, բայց ավելի թանկ: Այն, ինչ տեղի ունեցավ Վրաստանում վերջին օրերին, այն է, որ իսկապես կա դեֆիցիտ, որը բացարձակապես կապ չունի շուկայական տնտեսության հետ։ Դա պայմանավորված է աղմուկով և խուճապով»,- ասել է Պապավան:
Միաժամանակ նա հիշեցրել է, որ Վրաստանը կախված է ներմուծումից, և դրա ծավալը գրեթե երեք անգամ գերազանցում է արտահանմանը։ Վրաստանի բնակիչների պարենային զամբյուղը, ըստ փորձագետի, 80 տոկոսով ներկրված է։
«Ցավոք սրտի, մինչ օրս մենք չենք կարողացել տեղական արտադրությունն այնքան զարգացնել, որ այս համամասնությունը փոխվի։ Երբ դու կախված ես ներկրումից, համաշխարհային մասշտաբով գների բարձրացումը միանշանակ կազդի քեզ վրա»,- ասաց Պապավան։
Վերջին մի քանի օրվա ընթացքում Վրաստանի բնակիչները գնում են շաքարավազ, ինչպես նաև աղ, արևածաղկի ձեթ և ձավարեղեն՝ մտավախություն ունենալով, որ Ուկրաինայում ռազմական գործողությունների պատճառով այդ ապրանքները կպակասեն։
Իշխող «Վրացական երազանք» կուսակցությունը մեղադրել է «արմատական ընդդիմությանը» և ընդդիմադիր լրատվամիջոցներին արհեստական իրարանցում ստեղծելու մեջ։ Իշխող կուսակցության ղեկավարների կարծիքով՝ բնակչության շրջանում խուճապ են ստեղծում հենց ընդդիմադիր հեռուստաալիքներն ու կուսակցական ակտիվիստները։
Opinion, pooling and voting
