Youtube-ը հեռացրել է թուրքական ամսագրի ալիքում տեղադրված Հայոց ցեղասպանությունը ժխտող տեսանյութը

Տեսանյութերի դիտման համաշխարհային հարթակ YouTube-ը հեռացրել է թուրքական «Teori» ամսագրի ալիքում տեղադրված Հայոց ցեղասպանությունը ժխտող տեսանյութը, փոխանցում է Ermenihaber-ը։

Հարթակը «Հայոց ցեղասպանության սուտը և ՄԻԵԴ-ի աշխատաժողովը» վերնագրով տեսանյութի արգելափակումը հիմնավորել է դրանում ատելության խոսքի առկայությամբ:

Միջազգային վիդեոպորտալի բացատրության մեջ նշվել է, որ տեսանյութում խախտվել են համակեցության կանոնները:

Ավելացնենք, որ սա առաջին դեպքը չէ, երբ «Youtube»-ի ադմինիստրացիայի կողմից Հայոց ցեղասպանությունը կոպտորեն ժխտող տեսանյութ է արգելափակվում: Օրեր առաջ էլ թուրքական մեկ այլ ալիքից էր հեռացվել նույնաբովանդակ տեսանյութ, որում թուրք նախկին նախարար ու ներկայումս Չեխիայում Թուրքիայի դեսպան Էգեմեն Բաղըշը ժխտողական թեզեր էր ներկայացնում: Ընդ որում՝ այդ տեսանյութն արգելափակվել էր 2 անգամ, նախ՝ լրատվականի ալիքից, ապա՝ Բաղըշի անձնական ալիքից:

---

---