Քանի՞ միլիոն լարի են աշխատել բջջային օպերատորները 2021 թվականին

Վրաստանում գործող բջջային օպերատորներն արդեն կապի հանձնաժողովին են ներկայացրել 2021թ. տվյալները: Նրանց խոսքով, նախորդ տարի ոլորտի ընդհանուր մանրածախ եկամուտը կազմել է 554 մլն լարի։ Ամենաբարձր եկամուտը ստացել է բջջային կապի շուկայի առաջատար «Magti»-ն, որը կազմել է 258,6 մլն լարի։

Վրաստանում ընդհանուր առմամբ կա 5,16 մլն ակտիվ բաժանորդ, որից 41,7%-ը Magti-ից է, 33,3%-ը՝ Silknet-ից, 25%-ը՝ Vion-ից։

Ըստ եկամուտների՝ բջջային օպերատորների 2021 թվականի արդյունքները բաշխված են հետևյալ կերպ.

• MagtiCom – 258,564,670 լարի, նախորդ տարվա համեմատ ավելանալով 16.1%
• Silknet – 195,419,922 լարի, նախորդ տարվա համեմատ ավելանալով 9.4%
• Vion Georgia – 100,540,150 լարի, նախորդ տարվա համեմատ ավելանալով 13,5%:

Օպերատորների միջև եկամտի նման տարբերությունը պայմանավորված է մեկ բաժանորդից ստացվող ամսական եկամուտով:

• Magti-ի մեկ բաժանորդը ամսական վճարում է միջինը 10,98 լարի
• Silknet-ի մեկ բաժանորդը միջինը վճարում է 10,26 լարի
• Vion-ի մեկ բաժանորդը վճարում է միջինը 6,86 լարի։

Օպերատորների համար ամենաարագ աճող սեգմենտը բջջային ինտերնետի սեգմենտն է, որը 2021 թվականի վերջի դրությամբ կազմել է նրանց ամսական եկամտի 41%-ը։ Ընդհանուր առմամբ, նախորդ տարի բջջային ինտերնետի 3,2 մլն բաժանորդ սպառել է 318 171 տերաբայթ ինտերնետ, ինչը 65%-ով ավելի է նախորդ տարվա համեմատ։

Համեմատության համար նշենք, որ նախորդ տարի ձայնային զանգերի թիվն աճել է ընդամենը 4%-ով։ 2021 թվականին ընդհանուր առմամբ կատարվել է 5,752,035,699 հեռախոսազանգ, ընդ որում մեկ բաժանորդ ամսական միջինը խոսում է 164 րոպե։

---

---