Գնաճի մակարդակը ապրիլից կսկսի նվազել. էկոնոմիկայի նախարարի հայտարարությունը
Կառավարության կողմից ապրիլից սկսած գնաճի նվազեցման լավատեսական հաշվարկը պայմանավորված է արտաքին շուկաներում գերակշռող գործոններով, ասել է փոխվարչապետ, էկոնոմիկայի և կայուն զարգացման նախարար Լևան Դավիթաշվիլին։
Նրա կարծիքով՝ գները չպետք է բարձրանան, քանի որ պատերազմի շոկային ազդեցությունները նահանջել են, և, ըստ էության, իրավիճակը պետք է կայունանա։
«Ես ուզում եմ բոլորին հանդարտության կոչ անել, մենք տեսանք, որ խուճապային պահանջ է առաջացել այս կամ այն ապրանքի նկատմամբ՝ հիմնված կեղծ տեղեկատվության վրա», – ասել է Դավիթաշվիլին։
Նախարարն ընդգծել է, որ սպառողը հիմնականում տուժում է կեղծ տեղեկատվության տարածման պատճառով, քանի որ կարճաժամկետ կտրվածքով դա հաճախ հանգեցնում է սպեկուլյատիվ թանկացումների։
Մարտի սկզբին, մի քանի օր շարունակ, Վրաստանի բնակիչները զանգվածաբար գնում էին շաքարավազ, ինչպես նաև աղ, արևածաղկի ձեթ և ձավարեղեն՝ մտավախություն ունենալով, որ այդ ապրանքները կպակասեն ուկրաինական իրադարձությունների պատճառով։ Իշխող «Վրացական երազանք» կուսակցությունը մեղադրել է արմատական ընդդիմությանը և ընդդիմադիր լրատվամիջոցներին արհեստական ոգևորություն ստեղծելու մեջ։ Իշխող կուսակցության ղեկավարների կարծիքով՝ բնակչության շրջանում խուճապ են ստեղծում հենց ընդդիմադիր հեռուստաալիքներն ու կուսակցական ակտիվիստները։
Opinion, pooling and voting
