Վրաստանը «Արևելյան գործընկերության» առաջատար երկրներից է. Շտայնմայեր

Georgia Online-ի փոխանցմամբ՝ Վրաստանի վարչապետ Գեորգի Կվիրիկաշվիլին Նյու Յորքում հանդիպել է Գերմանիայի արտգործնախարար Ֆրանկ Վալտեր Շտայնմայերի հետ:

Վրաստանի կառավարության մամլո ծառայության հաղորդմամբ՝ հանդիպման գլխավոր թեմաները եղել են տարբեր ոլորտներում երկկողմ համագործակցությունը և Վրաստանի եվրոպական ու եվրաատլանտյան ինտեգրման ուղին:

Շտայնմայերը հայտարարել է, որ Վրաստանը «Արևելյան գործընկերության» առաջատար երկրներից է, որը հաջողությամբ կատարել է բոլոր չափանիշները, որոնք նախատեսված էին վիզային ռեժիմի ազատականացման գործողությունների ծրագրով:

Քննարկվել է նաև հոկտեմբերին Վրաստանում անցկացվելիք խորհրդարանական ընտրությունների հարցը: Կվիրիկաշվիլին ընդգծել է, որ իրենք ցանկանում են անցկացնել ազատ ու թափանցիկ ընտրություններ, որոնք կհամապատասխանեն միջազգային չափորոշիչներին:

Կվիրիկաշվիլին պատրաստակամություն է հայտնել առավելագույնս աջակցել Վրաստանում գերմանական ներդրումների իրականացմանը:

---

---