Windows-ի թարմացումների պատճառով խափանվել է հայտնի բրաուզերների աշխատանքը

Հայտնի բրաուզները դադարել են աշխատել Windows 10 եւ 11 օպերացիոն համակարգերի նոր թարմացումների թողարկումից հետո: Այս մասին հայտնում է  BleepingComputer պարբերականը:

Լրագրողներն ուշադրություն են դարձրել օգտատերերի բողոքներին, որոնք ի հայտ են եկել Microsoft-ի օպերացիոն համակարգերի ապրիլյան թարմացումների թողարկումից հետո: Համակարգիչների օգտատերերից շատերի մոտ խնդիրներ են առաջացել Chrome, Edge եւ Firefox բրաուզերները բացելիս:

«Windows-ի թարմացումները վերջերս բավականին հուսալի եւ կայուն են եղել՝ լուրջ խնդիրների մասին նվազագույն հաղորդումներով»,- նշել են հեղինակները:

Լրագրողները փորձարկել են Windows 11-ի թարմացումներն ու հաստատել խնդրի առկայությունը: Խնդրի ուսումնասիրության ժամանակ պարզվել է, որ աշխատանքի խափանումը կարող է պայմանավորված լինել համատեղելիության սխալով:

Մասնագետները հայտարարել են, որ  Windows-ի թարմացումների թողարկումից հետո համատեղելիության խնդիր է ի հայտ եկել արդիական թարմացման եւ ESET հակավիրուսի միջեւ: Որպես ժամանակավոր միջոց հակավիրուսի  ծրագրավորողները խորհուրդ են տվել ծրագրի կարգավորումներում միացնել ESET LiveGrid գործառույթը:

---

---