Վրաստանն ու Թուրքիան ծրագրում են պարզեցնել մաքսային ընթացակարգերը
Վրաստանն ու Թուրքիան կակտիվացնեն համագործակցությունը մաքսային ընթացակարգերի պարզեցման ուղղությամբ. Այս մասին Սարփի անցակետում Թուրքիայի առևտրի փոխնախարար Ռիզա Թունա Թուրագայի հետ հանդիպումից հետո հայտարարել է Վրաստանի ֆինանսների նախարարության եկամուտների ծառայության ղեկավար Լևան Կակավան։
«Մեր մաքսային վարչությունների նպատակն է էլ ավելի ակտիվացնել համագործակցությունը՝ հիմնված տեղեկատվության էլեկտրոնային փոխանակման վրա, ինչն իր հերթին էապես կպարզեցնի և կարագացնի մաքսային ձևակերպումները։ Մենք պատրաստ ենք ամեն օր աշխատել, որպեսզի միջազգային փոխադրումները կատարվեն անխոչընդոտ», – ասել է Կակավան։
Նրա խոսքով, բեռնաշրջանառության ավելացման արդյունավետ կառավարումը օգուտ կբերի երկու երկրների քաղաքացիներին և բիզնես ոլորտին։
Այցի ընթացքում Կակավան և Թուրագայը շրջել են երկու երկրների մաքսակետերում և տեղում ծանոթացել մաքսազերծման ընթացակարգերին։
Թուրքիան Վրաստանի խոշորագույն առեւտրային գործընկերն է։ Երկրների միջև ապրանքաշրջանառությունը 2021 թվականին կազմել է մոտ 2,1 մլրդ դոլար, ինչը կազմում է Վրաստանի ընդհանուր ապրանքաշրջանառության 15%-ը։ Ինչ վերաբերում է 2022 թվականի սկզբից ի վեր առաջին երեք ամիսներին, ապա երկրների միջև առևտուրը կազմել է 562,4 մլն դոլար, ինչը կազմում է Վրաստանի ընդհանուր ապրանքաշրջանառության 14,6%-ը։