I-IV և XI դասարանների դասագրքերը կթարմացվեն. վարչապետ

Վրաստանի կառավարության գործունեության մասին վարչապետ Իրակլի Ղարիբաշվիլիի գրավոր զեկույցում, որն արդեն ներկայացվել է խորհրդարան, նշված է, որ 2023 թվականին նախատեսվում է կազմել ինչպես XI դասարանի դասագրքեր, այնպես էլ տարրական՝ I-IV դասարանների թարմացված դասագրքեր:

Փաստաթղթի համաձայն՝ մինչև X դասարանի աշակերտները նոր ուսումնական տարվանից կսովորեն համապատասխան նոր, ժամանակակից ուսումնական դասագրքերով։

«2021 թվականին վերանայվել և հաստատվել են միջնակարգ մակարդակի առարկայական չափորոշիչները։ Բացի բովանդակային և մեթոդական թարմացումներից, միջնակարգ մակարդակի ազգային ուսումնական պլանում ավելացվել է նաև Վրաստանի պատմություն առարկան։

2022-2023 ուսումնական տարվանից տարրական կրթության առաջին դասարանում պարտադիր առարկային կավելանա նաև շախմատը՝ աշակերտների վերլուծական, տրամաբանական, քննադատական ​​մտածողությունը և գործնական խնդիրներ լուծելու հմտությունները զարգացնելու նպատակով», — ասված է փաստաթղթում։

Նշվում է նաև, որ տարրական դասարանների առարկաների ուսումնական ծրագրերը վերանայվում են: Պատրաստվել և հաստատվել է «Համակարգչային տեխնոլոգիաներ» առարկայի նորացված չափորոշիչը, որը ներդրվում է տարրական մակարդակում՝ II, III և IV դասարաններում։

Դպրոցներում փորձնական իրականացվում է «Բժշկի ժամը», որի ընթացքում որակավորված և պատրաստված դպրոցի բժիշկները տարրական դասարանների աշակերտներին տեղեկատվություն են տրամադրում առողջ ապրելակերպի, բռնության նշանների, հավասարության, կիբերհարձակման և իրավունքների ու պարտականությունների մասին:aliq.ge

---

---