ԵԽ-ն քննարկել է Վրաստանում լրատվամիջոցների ազատությունը և Իվանիշվիլիի դեմ պատժամիջոցները
Չորեքշաբթի օրը Եվրախորհրդարանում բանավեճ է տեղի ունեցել Վրաստանում ԶԼՄ-ների ազատության և լրագրողների անվտանգության մասին։
Եվրախորհրդարանի պատգամավորները աջակցել են ԵՄ-ին անդամակցելու Վրաստանի ձգտումներին՝ նշելով, որ այս գործընթացում հիմնական խոչընդոտներն են խոսքի ազատության դեմ պայքարը, բարեփոխումների բացակայությունը և օլիգարխիկ իշխանությունը։ Բրյուսելի բարձր ամբիոնից առաջին անգամ Վրաստանի նախկին վարչապետ, միլիարդատեր Բիձինա Իվանիշվիլիի դեմ պատժամիջոցների կոչեր են հնչել։
«Վրաստանի եվրոպական ճանապարհին աջակցելու համար կարևոր է պատժամիջոցներ սահմանել օլիգարխ Բիձինա Իվանիշվիլիի դեմ՝ վրացական քաղաքականության և տնտեսության մեջ նրա ապակառուցողական դերի համար։ Մենք՝ որպես Վրաստանի բարեկամներ, մի կողմ չենք կանգնի, երբ Վրաստանում լրատվամիջոցները թուլանում են, իսկ ժողովրդավարությունը նահանջում է», – բանավեճի ժամանակ ասել է Եվրախորհրդարանի պատգամավոր Միրիամ Լեքսմանը։
Եվրախորհրդարանի պատգամավոր Մարկետա Գրեգորովան նույնպես իր դիրքորոշումն է հայտնել իշխող «Վրացական երազանք» կուսակցության հիմնադիրի դեմ պատժամիջոցների հարցում։
«Ես պարզապես ուզում եմ անձնական հայտարարություն անել Վրաստանի մասին. կարծում եմ, որ Բիձինա Իվանիշվիլին օլիգարխ է, մենք կարող ենք ապացույցներ գտնել Կրեմլի հետ նրա կապերի մասին, և ապագայում կարող է նրա դեմ պատժամիջոցներ կիրառելու հնարավորություն լինել»,- ասել է Գրեգորովան։
Միևնույն ժամանակ, նա Վրաստանում լրատվամիջոցների հետ կապված իրավիճակը գնահատել է որպես «շատ ծանր»՝ նշելով, որ և՛ լրագրողները, և՛ լրատվամիջոցների սեփականատերերը ենթարկվում են «վիրավորանքի, հարձակումների և սպառնալիքների»։
«Շատ հիասթափեցնող է, որ Վրաստանի կառավարությունը միանում է լրագրողների որսին՝ նրանց պաշտպանելու փոխարեն», – ավելացրել է Գրեգորովան։
Եվրախորհրդարանի պատգամավոր Վիոլա ֆոն Կրամոնը նույնպես ասել է, որ այժմ Վրաստանում «լրագրողներին պաշտպանելու փոխարեն հարձակվում են նրանց վրա»։ Նրա խոսքով՝ մայիսի վերջին երեքուկես տարվա ազատազրկման դատապարտված ընդդիմադիր «Մթավարի» հեռուստաալիքի գլխավոր տնօրեն Նիկա Գվարամիան «օրենքի գերակայության խախտման վառ օրինակ» է դարձել։
«Երկար տարիներ սպասելուց հետո դուք մեծ հույսեր էիք կապում հետխորհրդային պետության, Վրաստանի հետ: Եվ հիմա մենք տեսնում ենք, թե ինչի է հասել երկիրը. բարեփոխումների գործընթացի փոխարեն այս բոլոր արևմտամետ հայտարարություններն անտեսվեցին: Մենք տեսնում ենք, որ կոռուպցիայի և մամուլի ազատության ցուցանիշները նվազում են»,- ասել է Վիոլա ֆոն Կրամոնը։
Եվրախորհրդարանի լիտվացի պատգամավոր Պետրաս Աուշտրևիչյուսը նշել է, որ «անկախ լրատվամիջոցների ազատությունը Եվրամիությանը Վրաստանի անդամակցության անբաժանելի մասն է»։
«Քաղաքական միջամտությունը լրատվամիջոցներին անընդունելի է։ Եթե նախկինում Եվրախորհրդարանը անկեղծորեն հավատում էր, որ Վրաստանի իշխանությունները դա հասկանում են, ապա այժմ մենք պահանջում ենք փոխել Վրաստանի մոտեցումներն ու քաղաքականությունը։ Ժամանակն է, որ Թբիլիսին հասկանա, որ Վրաստանի ապագան վտանգված է»,– ասել է Ավստրևիչուսը։
Գվարամիայի ձերբակալության մասին խոսել է նաեւ լատվիացի պատգամավոր Սվեն Միկսերը։ Քննադատելով Վրաստանի իշխանություններին՝ նա մատնանշել է, որ «քաղաքականությունը պետք է հիմնված լինի շատ լավ մտածված ռազմավարության վրա, այլ ոչ միայն էմոցիաների»։
«Մեզ շատ անհանգստացնում է այն բացասական միտումը, որը մենք տեսնում ենք այս ոլորտում։ Վրաստանի կառավարության վերջին արարքը [Գվարամիայի ձերբակալությունը] հիասթափեցրեց շատ մարդկանց, և ես կարծում եմ, որ նման իրավիճակներում մենք պետք է ավելի կոշտ դիրքորոշում ընդունենք Վրաստանի նկատմամբ, և նրանք [Վրաստանի իշխանությունները] պետք է հասկանան, որ խոսքը Վրաստանի մասին է»,- ասել է նա։
Եվրախորհրդարանի անդամ, Լեհաստանի նախկին արտգործնախարար Աննա Ֆոտիգան մեջբերում է Վրաստանի նախկին նախագահ Միխեիլ Սաակաշվիլիի վերջին կոչը. բանտից նա դիմել է եվրոպացի քաղաքական գործիչներին՝ կոչ անելով չթողնել Վրաստանը հետխորհրդային ճահիճում։
«Սահակաշվիլին դիմեց մեզ՝ Վրաստանի լավագույն բարեկամներիս, նշելով, որ մինչ մենք քննադատում ենք ներկայիս իշխանություններին, նա տեսնում է պատմական վտանգը, որը սպառնում է իր երկրին։ Նա խնդրեց մեզ տալ իրենց այս կարգավիճակը, խնդրեց մեզ չթողնել Վրաստանը հետխորհրդային ճահիճում և չպատժել վրաց ժողովրդին՝ զրկելով նրան ապագայի ներուժից»,- ասել է Ֆոտիգան։
Եվրախորհրդարանի պատգամավոր Մարինա Կալյուրանդը վրացի քաղաքական գործիչներին հորդորել է մի կողմ թողնել տարաձայնությունները և քննարկումը դիտել որպես «վերջին նախազգուշացում»:
«Իշխող կուսակցության և ընդդիմության վրաց քաղաքական գործիչներին հորդորում եմ այսօրվա քննարկումն ընդունել որպես վերջին նախազգուշացում։ Մի կողմ դրեք կուսակցական շահերը, դադարեք միմյանց մեղադրել և միասին սկսեք աշխատել ժողովրդավարական բարեփոխումների վրա: Հնարավորությունների պատուհանը դեռ բաց է, և դա այն է, ինչ վրաց ժողովուրդը ակնկալում է ձեզանից»,- ասել է Կալյուրանդը։
Եվրախորհրդարանում բանավեճը նախորդել է Վրաստանում ԶԼՄ-ների ազատության և լրագրողների անվտանգության մասին բանաձևի քվեարկությանը։ Փաստաթղթի նախագիծն առաջարկել է Եվրախորհրդարանի ամենամեծ խմբակցությունը՝ պահպանողական Եվրոպական ժողովրդական կուսակցությունը (ԵԺԿ): Այն կվերանայվի այսօր։
Opinion, pooling and voting
