Ծերերը ամիսներ շարունակ չեն լողացել. Ծերանոցը փակել են
Պետական խնամակալության գործակալությունը վերաբնակեցնելու է Արևելյան Վրաստանի Ծնորի տուն-ինտերնատի շահառուներին, որտեղ տարեցները ապրել են հակասանիտարական պայմաններում և չեն ստացել անհրաժեշտ բժշկական օգնություն։
«Շահառուների իրավունքները պաշտպանելու նպատակով հնարավորինս սեղմ ժամկետներում որոշում կկայացվի նրանց այլընտրանքային ծառայության անցնելու մասին»,– ասվում է նախարարությունից։
«Ծնորի» ծերանոցը հասարակական կազմակերպություն է Սիղնախի շրջանում (Կախեթի), որը սպասարկում է 21 տարեցների։ Նրանցից 17-ին ֆինանսավորում է Պետական խնամակալության գործակալությունը։
Վրաստանի հանրային պաշտպանի գրասենյակն այս շաբաթ հայտնել է տուն-ինտերնատում անբավարար պայմանների մասին։ Օմբուդսմենի ներկայացուցիչները հաստատությունում ցնցող պատկեր են հայտնաբերել՝ ծերերը հագել են հին, պատառոտված ու կեղտոտ շորեր, ոմանք ամիսներ շարունակ լոգանք չեն ընդունել, իսկ շենքի ներսում տհաճ հոտ է զգացվել։
Հանրային պաշտպանի զեկույցից հայտնի է նաև, որ երկու տասնյակ շահառուների տրամադրության տակ կա միայն մեկ սանհանգույց, իսկ զուգարանները շատ կեղտոտ են։ Միաժամանակ, Ծնորին բժիշկ չունի, իսկ եղած կադրերը պատրաստված չեն տարեցների խնամքի հարցում։ Ավելին, անձնակազմի վերաբերմունքը շահառուների նկատմամբ մեծապես տարբերվում է՝ կախված նրանց ֆիզիկական և հոգեկան առողջությունից:
Իրավապաշտպանները հարցեր ունեն նաև տարեցների սննդակարգի հետ կապված՝ տարեցները սնվել են այն ամենով, ինչ ստացել են, հատուկ կազմված ճաշացանկ չեն ունեցել։
Հունիսի 22-ին Օմբուդսմենը կոչ է արել Առողջապահության նախարարությանը արձագանքել հայտնաբերված խախտումներին և շահառուներին անհապաղ տեղափոխել արժանապատիվ պայմաններ ունեցող այլ հաստատություններ։
Opinion, pooling and voting
