Վրաստանն ու Հայաստանը պարզեցրել են ապրանքների տարանցման մաքսային ձևակերպումները
Վրաստանը և Հայաստանը պարզեցրել են մաքսային ձևակերպումները՝ ապրանքների առցանց տեղեկատվության էլեկտրոնային փոխանակման միջոցով։
Այսօր Թբիլիսիում Վրաստանի ֆինանսների նախարարության եկամուտների ծառայության ղեկավար Լևան Կակավան և Հայաստանի պետական եկամուտների կոմիտեի նախագահ Ռուստամ Բադասյանը ստորագրել են տվյալների փոխանակման նախնական էլեկտրոնային համակարգի ամբողջական ներդրման մասին արձանագրություն։
Արձանագրությունը կողմերին հնարավորություն է տալիս ապահովելու երկու երկրների սահմանների միջև տեղափոխվող բեռների և տրանսպորտային միջոցների վերաբերյալ տեղեկատվության վաղ փոխանակում, հայտնում է Վրաստանի ֆինանսների նախարարությունը։
Դա մեծապես կհեշտացնի մաքսային ձևակերպումները և կբարձրացնի վերահսկողական միջոցառումների արդյունավետությունը ինչպես անցակետերում, այնպես էլ տնտեսական մաքսազերծման գոտիներում, նշում են գերատեսչությունում։
Արձանագրության իրականացումը կնպաստի մաքսային վարչությունների միջև արդյունավետ համագործակցությանը՝ ապահովելով անվտանգության պահանջների պահպանումը և օրինական առևտուրը։
Հայաստանի Հանրապետության պատվիրակությունը՝ ֆինանսների նախարար Տիգրան Խաչատրյանի գլխավորությամբ, այսօր աշխատանքային այցով գտնվում է Վրաստանում։
Վրաստանի և Հայաստանի միջև գործում է ազատ առևտրի ռեժիմ, և Հայաստանը Վրաստանի հիմնական առևտրային գործընկերների տասնյակում է։
Վրաստանում գործում է շուրջ 400 ընկերություն, որոնք ստեղծվել են հայկական կապիտալի միջոցներով։ Հայաստանի հետ համագործակցությունը հատկապես ինտենսիվ է տրանսպորտային լոգիստիկայի ոլորտում՝ ցամաքային տրանսպորտի ուղղությամբ։
Վրաստանը և Հայաստանը դիվանագիտական հարաբերություններ հաստատեցին 1992 թվականի հուլիսի 17-ին։
Opinion, pooling and voting
