Արգելել Իվանիշվիլիի շրջապատի մարդկանց զբաղեցնել պետական պաշտոններ. Դոլիձե
«Ժողովրդի համար» կուսակցության առաջնորդ Աննա Դոլիձեն ներկայացրել է Վրաստանի ապաօլիգարխացման ծրագիր։ Ծրագրի կետերից է Բիձինա Իվանիշվիլիի ընկերություններում աշխատող անձանց արգելել քաղաքական պաշտոններ զբաղեցնել։ Դոլիձեն իր ծրագիրն է առաջարկում Եվրամիության 12 առաջարկությունների կատարման աշխատանքային խմբին։
«Այն անձինք, ովքեր մասնագիտական և անձնական վստահության հարաբերություններ են հաստատել Բիձինա Իվանիշվիլիի հետ՝ աշխատելով նրա ընկերություններում, այդ թվում՝ «Քարթու» բանկում, չպետք է կարողանան քաղաքական պաշտոններ զբաղեցնել։
Օրինակ՝ իմ առաջարկով պաշտոններում չեն կարող լինել Իրակլի Ղարիբաշվիլին, Ջուանշեր Բուրճուլաձեն, Իրակլի Կարսելաձեն, Զուրաբ Ազարաշվիլին, Լաշա Խուցիշվիլին, Գուրամ Մաճարաշվիլին, Դավիթ Մատիկաշվիլին, Դաչի Բերայան և էլի շատ մարդիկ նախկին իշխանություններից։
Բազմաթիվ ուսումնասիրություններ ցույց են տալիս, որ հենց Իվանիշվիլիի բիզնես ընկերությունների աշխատակիցների միջոցով է վերահսկվում մեր պետության քաղաքականության շատ մեծ մասը։ Նման մոտեցումների օրինակ կարելի է գտնել Արևելյան Եվրոպայում, որտեղ իրականացվել են ապակոմունիզացիայի բարեփոխումներ։ Կա նաև Իրաքի օրինակը, որտեղ որոշակի քաղաքական կուսակցության անհատներին թույլ չեն տալիս քաղաքական պաշտոններ զբաղեցնել։
Եթե մենք ուզում ենք խլել այն լծակները, որոնց շնորհիվ Բիձինա Իվանիշվիլին, այլ մեթոդների հետ մեկտեղ, պահպանում է ոչ պաշտոնական կառավարումը, մենք պետք է սահմանափակենք քաղաքական որոշումներ կայացնելու հնարավորությունը միայն այն մարդկանցով, ովքեր աշխատել են կամ աշխատում են նրա բիզնես ընկերություններում»,- ասել է Դոլիձեն։
Հիշեցնենք, որ Վրաստանի համար ԵՄ անդամակցության թեկնածուի կարգավիճակ ստանալու պայմաններից մեկը ապաօլիգարխացումն է։
Opinion, pooling and voting
