Ղարիբաշվիլին Եվրահանձնաժողովի ղեկավարին ուղղված նամակում պաշտպանել է Բիձինա Իվանիշվիլիին
Վրաստանի վարչապետ Իրակլի Ղարիբաշվիլին հայտարարել է, որ Բիձինա Իվանիշվիլիի ոչ պաշտոնական կառավարման մեղադրանքները որպես անձնական վիրավորանք է ընդունում։ Այս մասին ասվում է նամակում, որն այսօր Ղարիբաշվիլին ուղարկել է Եվրահանձնաժողովի նախագահ Ուրսուլա ֆոն դեր Լեյենին։
Վարչապետի նամակը՝ նվիրված Վրաստանի ամենահարուստ մարդուն, միլիարդատիրոջը և իշխող «Վրացական երազանք» կուսակցության հիմնադիրին, հրապարակվել է կառավարության կայքում։
Ղարիբաշվիլին պնդում է, որ Վրաստանի վերաբերյալ հունիսի 9-ի Եվրախորհրդարանի բանաձեւը, որը պահանջում է պատժամիջոցներ կիրառել Իվանիշվիլիի դեմ, «պարունակում է բազմաթիվ փաստական անճշտություններ»:
«Եվրախորհրդարանի բանաձեւում այս գրառումները հիմք չունեն և ուղղված են Վրաստանի ներկայիս կառավարման համակարգի վարկաբեկմանը։ Ընդդիմախոսները երբեք չեն ներկայացրել Բիձինա Իվանիշվիլիի՝ քաղաքականությանը կամ արդարադատությանը միջամտելու փաստերը, նա այլեւս տնտեսական գործունեություն չի ծավալում Վրաստանում, Ռուսաստանի հետ նրա անձնական կամ գործարար կապերի նախադեպեր չկան։ Ուստի այն ամենը, ինչ գրված է ոչ ֆորմալ կառավարության մասին բանաձեւում, լրիվ կեղծ է»,- ասված է Ղարիբաշվիլիի նամակում։
Իր ուղերձում Վրաստանի վարչապետը կոչ է անում Ուրսուլա ֆոն դեր Լեյենին ստիպել Եվրահանձնաժողովին «հստակորեն տարանջատվել ապաօլիգարխացման արձանագրության անձնավորումից»։
«Խոսակցությունն այն մասին, որ կառավարությունն իրականում ղեկավարում է ոչ թե վարչապետը, այլ մեկուկես տարի առաջ քաղաքականությունից հեռացած անձը վիրավորական է անձամբ ինձ և իմ երկրի համար»,- գրում է Ղարիբաշվիլին։
Opinion, pooling and voting
