Վրաստանում Starlink լայնաշերտ ինտերնետին հնարավոր կլինի միանալ 2023 թվականին

Հաջորդ տարվանից Իլոն Մասկի Starlink նախագիծը Վրաստանին արբանյակային համակարգերի միջոցով հասանելիություն կտա գերարագ լայնաշերտ ինտերնետին։ Այս մասին այսօր հայտարարել է Վրաստանի էկոնոմիկայի նախարար Լեւան Դավիթաշվիլին Starlink Market Access-ի մենեջեր Բեն ՄքՎիլիամսի հետ հանդիպումից հետո։

Վրաստանի կապի ազգային հանձնաժողովը վերջերս թույլտվություն է տվել Starlink արբանյակային ինտերնետ ծառայության գործարկման համար, և Վրաստանի նորարարության և տեխնոլոգիաների գործակալության տեխնոպարկերը երկրի ողջ տարածքում կլինեն առաջին օբյեկտները, որոնք հասանելի կլինեն այս ծառայությանը:

Դավիթաշվիլին կարծում է, որ Վրաստանում Starlink-ի հայտնվելով երկրում սկսվում է «ինտերնետացման նոր փուլ»։

Նա ընդգծել է, որ Վրաստանը կլինի առաջին երկիրը տարածաշրջանում, որը կառաջարկի միացում Starlink-ին։

«Մեր երկրի բարդ աշխարհագրության պատճառով բարձրորակ ինտերնետը հասանելի չէ բոլոր վայրերում։ Այնուամենայնիվ, SpaceX Starlink նախագծի բարձրորակ արագ ինտերնետը հասանելի կլինի ամենուր»,- ասել է նա։

Նախարարի խոսքով՝ դա գործոն է դառնալու զբոսաշրջության և ընդհանուր առմամբ տնտեսության զարգացման համար։ «Իրականում երկրում չի լինի մի տեղ, որտեղ չի լինի բարձրորակ ինտերնետ»,- նշել է Դավիթաշվիլին։

Երկրում գերարագ լայնաշերտ ինտերնետի ներդրումը կնպաստի նաև հանրային ծառայությունների մատուցման բարելավմանը, դպրոցներին ինտերնետի ապահովմանը, անվտանգության բարձրացմանը և նոր հնարավորությունների ստեղծմանը, ասել է նախարարը։

---

---