Բաքու-Թբիլիսի-Կարս երկաթուղու մաքսային հսկողությունը կպարզեցվի

Նախատեսվում է ավարտել Բաքու-Թբիլիսի-Կարս երկաթուղու շրջանակներում տարանցիկ մաքսային ընթացակարգերի դյուրացման համար տեղեկատվության նախնական փոխանակման մասին Ադրբեջանի, Վրաստանի և Թուրքիայի կառավարությունների միջև համաձայնագրի կատարման հետ կապված որոշ աշխատանքներ:

Այս մասին ադրբեջանական «Report»-ին ասել է Թուրքիայի առեւտրի փոխնախարար Ռիզա Թունա Թուրագայը։

Նրա խոսքով, նախատեսվում է երկրների միջև իրականացնել պարզեցված մաքսային ծառայություն և կիսել ռիսկերի վերլուծությունը՝ նախապես տեղեկատվության փոխանակման միջոցով։ Ներկայումս նույն հսկողությունն իրականացնում են Ադրբեջանի, Վրաստանի և Թուրքիայի մաքսային վարչությունները, ինչը ժամանակի վատնում է առաջացնում։

Թուրագայը հիշեցրել է, որ Թուրքիայի, Ադրբեջանի և Վրաստանի կառավարությունների միջև մաքսային հարցերով եռակողմ հանձնաժողովի առաջին նիստը տեղի է ունեցել անցյալ տարվա հոկտեմբերին Իզմիրում, իսկ այսօր երկրորդ հանդիպումը կայացել է Բաքվում։ Հանդիպման նպատակը մաքսային ընթացակարգերի պարզեցումն է։

Երկաթուղով առևտրի ծավալը շատ փոքր է, և նախարարը ակնկալում է, որ բեռնափոխադրումների ծավալն աստիճանաբար կավելանա։

Նշենք, որ Բաքու-Թբիլիսի-Կարս երկաթուղային գիծը բացվել է 2017 թվականի հոկտեմբերի 30-ին։ Երկաթուղային գիծը միացնում է Ասիայի և Եվրոպայի երկաթուղային ցանցերը։ Այն ամենակարճ ճանապարհն է ոչ միայն 3 երկրների, այլև Ասիայի և Եվրոպայի միջև։ ԲԹԿ-ն թույլ է տալիս ավելի քան 2 անգամ կրճատել բեռնափոխադրումների վրա ծախսվող ժամանակը։ Երկաթուղին հեշտացնում է մուտքը Կենտրոնական Ասիայի երկրների եվրոպական և համաշխարհային շուկաներ՝ Թուրքմենստան, Ղազախստան, Ուզբեկստան, Ղրղզստան, Տաջիկստան և Աֆղանստան:

Գծի 504 կիլոմետրանոց հատվածը՝ 846 կիլոմետր ընդհանուր երկարությամբ, ընկնում է Ադրբեջանի տարածքում։ Վրաստանով անցնում է երկաթուղային գծի 263 կիլոմետրը։ 79 կիլոմետր ճանապարհը գտնվում է Թուրքիայի տարածքում։ Նախատեսվում է առաջին փուլում այս ճանապարհով տեղափոխել 5 մլն տոննա բեռ, հաջորդ փուլում՝ 17 մլն տոննա, իսկ դրանից հետո՝ ավելին։

---

---