Արքայազն Չարլզը դարձավ Մեծ Բրիտանիայի թագավոր

Մեծ Բրիտանիայի վարչապետ Լիզ Թրասը հայտարարել է, որ Բրիտանիայի նոր թագավոր է դարձել Չարլզ III -ը։ Նրա թագադրման արարողությունը տեղի կունենա հնարավորինս շուտ։

Ժառանգը գահ է բարձրանում միապետի մահից անմիջապես հետո։ Թագավորը պաշտոնապես գահ կբարձրանա 24 ժամվա ընթացքում իրավահաջորդության խորհրդի նիստի ժամանակ։

Իր հայտարարության մեջ Նորին Մեծություն Թագավորն ասել է. «Իմ սիրելի մոր՝ Նորին Մեծություն Թագուհու մահը մեծ տխրության պահ է ինձ եւ իմ ընտանիքի բոլոր անդամների համար»:

Հիշեցնենք՝ Մեծ Բրիտանիայում մահացել է Եղիսաբեթ II թագուհին։ Այս մասին հայտնել է Բուքինգհեմյան պալատը։ Պալատի դարպասներին սգո հայտարարություն է տեղադրվել։

Եղիսաբեթ II-ը՝ թագավոր Ջորջ VI-ի և լեդի Էլիզաբեթ Բոուս-Լիոնի ավագ դուստրը, ծնվել է 1926 թվականի ապրիլի 21-ին Լոնդոնում։ Ստացել է տնային կրթություն։ 1945 թվականին նա ընդունվել է Օժանդակ տարածքային ծառայության՝ բրիտանական բանակի կանանց բաժինը։

1947 թվականին տեղի է ունեցել Էլիզաբեթի և Հունաստանի և Դանիայի արքայազն Ֆիլիպի հարսանիքը։ Նրանք ունեցել են չորս երեխա։

Թագուհին գահ է բարձրացել 1952 թվականին, 2015 թվականին նա դարձել է Մեծ Բրիտանիայի և Անգլիայի պատմության մեջ ամենաերկար կառավարող միապետը։

Հունիսի սկզբին թագավորությունում տոնակատարություններ են անցկացվել «պլատինե հոբելյանի»՝ Եղիսաբեթ II-ի գահակալության 70-ամյակի կապակցությամբ։

Եղիսաբեթ II-ի օրոք փոխվեցին 14 վարչապետներ (առաջինը Ուինսթոն Չերչիլն էր), բրիտանական բազմաթիվ նախկին գաղութներ անկախություն ձեռք բերեցին։ Համագործակցության մի շարք երկրներ դարձան հանրապետություններ։ Դրանցից վերջինը՝ Բարբադոսը, անցյալ տարի։

Թագուհին հանդիպել է բազմաթիվ պատմական դեմքերի՝ Ջոն Քենեդիից և Յուրի Գագարինից մինչև Դոնալդ Թրամփը և Վլադիմիր Պուտինը: Եղիսաբեթ II-ը բազմաթիվ ֆիլմերի և հեռուստասերիալների, այդ թվում՝ գեղարվեստական ​​գրականության հերոսուհին է և բրիտանական ժամանակակից կյանքի և մշակույթի խորհրդանիշներից մեկը։

Սեպտեմբերի 8-ին Բուքինգհեմյան պալատը հաղորդագրություն է տարածել, որտեղ նշվում է, որ 96-ամյա թագուհին գտնվում է իր առողջությամբ մտահոգ բժիշկների հսկողության տակ։

Նրա առողջական վիճակի վատթարացման մասին լուրերից հետո բրիտանացի և համաշխարհային առաջատար քաղաքական գործիչները սոցիալական ցանցերում նրան շուտափույթ ապաքինում մաղթեցին:

---

---