Որքա՞ն արժե կարտոֆիլը Նինոծմինդայում

Վրաստանում կարտոֆիլի գնի կտրուկ աճ է նկատվում. EastFruit-ի գների մոնիտորինգի տվյալների համաձայն՝ Վրաստանում կարտոֆիլի մեծածախ գները նախորդ շաբաթվա համեմատ աճել են 50%-ով։ Գործակալության տվյալներով՝ գինը 0,8 լարի/կգ-ից (0,28 դոլար) հասել է 1,2 լարի/կգ-ի (0,42 դոլար):

Նինոծմինդայի մունիցիպալիտետում կարտոֆիլի գները մնացած շրջանների համեմատ ցածր են մնում։ Այն տատանվում է 0,7-1 լարիի սահմաններում։ Ջավախքում այս տարի եղանակային անբարենպաստ պայմանների պատճառով կարտոֆիլի բերքը քիչ է։ Սակայն այնտեղ, որտեղ կարկուտն ու ցրտահարությունը չեն հասել դաշտերին, լավ բերքատվություն է նկատվում։

Նինոծմինդայի մունիցիպալիտետի Եֆրեմովկա գյուղի բնակիչ Համլետ Խաչատրյանը մեզ հետ զրույցում ասաց, որ այս տարվա բերքը նախորդ տարվա համեմատ 2 անգամ քիչ է. «Հուլիսին ցուրտ էր, օգոստոսին՝ շատ շոգ։ Մեր գյուղում, օրինակ, ջուր չկար, որ արտերը ոռոգեինք։ Եթե կարողանայինք ջրել դաշտերը, շատ ավելի բերք կստանայինք։ Եթե անցյալ տարի 10 արից ստացել ենք 1 տոննա կարտոֆիլ, ապա այս տարի, կարծում եմ, որ մոտ կես տոննա կստանանք»։ – ասում է Համլետ Խաչատրյանը։

Բացի բերքատվության նվազեցումից, բերքահավաքի գործընթացը նույնպես դժվար է, քանի որ երաշտի պատճառով կարծրացած հողը վնասում է կարտոֆիլի պալարները, երբ դրանք փորվում են տրակտորներով:

Այս մասին մանրամասն խոսեց Եֆրեմովկա գյուղի բնակիչ Համլետ Խաչատրյանը։