Զանիեր. ԵԱՀԿ-ն պայմաններ է ստեղծում, որպեսզի ղարաբաղյան հիմնախնդրի կողմերը պայմանավորվեն
Լեռնային Ղարաբաղի հիմնախնդրի լուծման գործում ԵԱՀԿ-ի դերը պայմաններ ստեղծելն է, որպեսզի երկրները պայմանավորվածություն ձեռք բերեն: Այդ մասին «Գոլոս Ռոսիի» ռադիոկայանի հետ հարցազրույցում հայտնել է ԵԱՀԿ գլխավոր քարտուղար Լամբերտո Զանիերը:
«Մինսկի խումբն իր առաջարկություններն է ներկայացնում՝ ինչպես կարելի է հասնել փոխզիջման: Մենք հասել ենք մի մակարդակի, երբ թվում է՝ արդեն ձեռք են բերվել համաձայնագրի հիմնական կետերը: Հայաստանի եւ Ադրբեջանի նախագահների`ռուս նախագահ Դմիտրի Մեդվեդեւի մասնակցությամբ մի քանի գագաթաժողովներում եւ հանդիպումներում թվում էր, թե կողմերը մոտ են համաձայնության գալուն: Սակայն հետո կողմերն էլի սկսում էին մեղադրել միմյանց: ԵԱՀԿ-ն ամենակարող չէ, մենք չենք կարող բռնի ընդունել տալ մեր որոշումը: Մենք պարզապես փորձում ենք պայմաններ ստեղծել: Լեռնային Ղարաբաղի հակամարտության կարգավորման հիմնական խնդիրն այն է, որ տարբեր առաջարկներ տարբեր պատճառներով արգելափակվում են այս կամ այն երկրի կողմից», – ասել է ԵԱՀԿ գլխավոր քարտուղարը:NEWS.am