Դմանիսիում մահացած են գտել գիտահնագիտական կենտրոնի ղեկավարին

Դմանիսի քաղաքի գիտահնագիտական կենտրոնի ղեկավար Գոչա Կիլաձեին մահացած են գտել

Հայտնում է Ազատություն ռադիոկայանի վրացական ծառայությունը։

Ըստ նախնական տեղեկությունների՝ գիտնականն ինքնասպանություն է գործել կենտրոնի տարածքում։ Մահացած տղամարդուն հայտնաբերել են Դմանիսիի բնակիչները:

Դեպքի առթիվ հետաքննություն է սկսվել Վրաստանի Քրեական օրենսգրքի 115-րդ հոդվածով, որը ենթադրում է ինքնասպանության դրդում։

Միջադեպի որևէ հանգամանք հայտնի չէ։ Կիլաձեի գործընկերներն ասում են, որ վերջին երկու ամիսների ընթացքում հնագետը գործնականում ապրել է աշխատավայրում և չի լքել կենտրոնը։ Միևնույն ժամանակ նրանք նշում են, որ իրենց կազմակերպությունը սեպտեմբերի վերջին ավարտել է ուսանողների վերապատրաստման բոլոր ծրագրերը։

Հնագետ Գոչա Կիլաձեն եղել է Վրաստանի ազգային թանգարանի աշխատակից, Դմանիսիի գիտական խմբի անդամ, և մոտ 20 տարի ղեկավարել է Դմանիսի թանգարան-արգելոցը։

2000-ականների կեսերին նա մասնակցել է հնագիտական արշավախմբերի, որոնց ընթացքում հայտնաբերվել են Homo սեռի ամենավաղ հայտնի ներկայացուցիչների գանգերը, նրանց տարիքը գնահատվում է 1,8 միլիոն տարի: Այս նյութերը Աֆրիկայի սահմաններից դուրս հոմինիդների գոյության ամենահին վկայությունն են։ Որոշ մարդաբաններ դրանք համարում են վերջին տասնամյակների կարևորագույն գտածոներից մեկը։