Նինոծմինդայի նոր մաքսակետի պաշտոնական բայց՝ «թաքուն» բացումը

Վրաստան-Հայաստան սահմանին բացվել է «Նինոծմինդա» արդիականացված ավտոմոբիլային մաքսային անցակետը։

Միջոցառմանը ներկա էին Վրաստանի ֆինանսների նախարար Լաշա Խուցիշվիլին, մաքսային վարչության պետ Լևան Կակավան, ՀՀ եկամուտների կոմիտեի նախագահ Ռուստամ Բադասյանը, Վրաստանի և Հայաստանի այլ պաշտոնյաներ։

Նինոծմինդայի համայնքային ռադիո NOR-ի լրագրողներին թույլ չեն տվել մասնակցել բացման արարողությանը չնայծ, որ խոստացել են թողնել բացման պաշտոնական արարողությանը : Սակայն լրագրողները դրսում և այն էլ հեռվից են լուսանկարել։

Ինչպես ավելի վաղ հայտնել էր Վրաստանի ֆինանսների նախարարության եկամուտների ծառայությունը, ժամանակակից մաքսային ենթակառուցվածքի զարգացումը և մաքսային ընթացակարգերի արդյունավետ ներդրումը երկրի կարևոր առաջնահերթություններից են։

Հավելենք, որ 2022 թվականի սեպտեմբերի 9-ին Հայաստանի հետ սահմանին գտնվող Նինոծմինդայի մաքսային անցակետը տեղափոխվել է կառավարման տեղեկատվական նոր համակարգ։

Վրաց-հայկական սահմանի երկարությունը 224 կիլոմետր է։ Բացի Նինոծմինդայից, սահմանին կա ևս երկու մաքսակետ՝ Սադախլոն և Գուգուտին։

«Նինոծմինդա» մաքսային անցակետում միջազգային բեռնափոխադրումներ իրականացնող բեռնատարների, մարդատար և թեթև մեքենաների համար կազմակերպվել է 11 ելք՝ հագեցած ժամանակակից կառավարման համակարգերով։ Անցակետում աշխատելու է մոտ 70 մաքսավոր։ Ամեն օր երկու ուղղություններն էլ նախատեսված են առնվազն 600 բեռնատար, 3000 ավտոմեքենա և 8000 ուղևոր տեղափոխելու համար։