ԵՄ-ն առաջարկում է չճանաչել Ուկրաինայի և Վրաստանի օկուպացված տարածքներում տրված ռուսական անձնագրերը
Բաց մի՛ թողեք։ Անվճար հնարավորություններ ԵՄ-ից՝ հայաստանցի երիտասարդների համար
Անկախ նրանից՝ ուսանող եք, թե երիտասարդ մասնագետ, ակտիվորեն մասնակցում եք ձեր համայնքային կյանքին կամ դեռ դպրոցական եք, Եվրոպական միությունն անվճար հնարավորությունների լայն ընտրանի է առաջարկում հայաստանցի երիտասարդներին՝ կրթաթոշակներ, վերապատրաստումներ, արտերկրյա ուսում կամ կամավորություն, պրակտիկա, հատուկ արտոնություններ կամ դրամաշնորհներ:
ԵՄ-ն ձեզ համար առաջարկելիք հնարավորություններ ունի՝ անկախ նրանից, թե դուք ցանկանում եք ընդլայնել ձեր մտահորիզոնը, օգնել ձեր համայնքին, զարգացնել ձեր հմտությունները կամ սկսել նոր բիզնես։ Բայց դրանք գտնելը կարող է դժվար լինել, ուստի ձեզ օգնելու համար մենք մշակել ենք ուղեցույցներ Հայաստանում երիտասարդների համար առկա հնարավորությունների մասին:
Ուղեցույցը ներկայացնում է հայաստանցի երիտասարդների համար առկա ինչպես միջազգային, այնպես էլ տեղական հնարավորությունները, ինչպես նաև տեղական կոնտակտներ, որոնք կօգնեն ձեզ դիմելիս:
Նշված ուղեցույցը բաժանված է համապատասխան բաժինների, որոնցում ներկայացված են հնարավորությունները հետևյալ խմբերի համար.
- ուսանողներ,
- քաղաքացիական ակտիվիստներ, երիտասարդ առաջնորդներ և կամավորներ,
- դպրոցականներ,
- պրակտիկա և ուսուցում փնտրողներ,
- երիտասարդ մասնագետներ։
Իսկ եթե դուք ոգեշնչում եք փնտրում, վերջին բաժնում ներկայացված է ձեզ նման երիտասարդների փորձը, ովքեր արդեն օգտվել են ԵՄ հնարավորություններից:
Ուստի բաց մի՛ թողեք։ Սկսե՛ք փնտրելը և պատրաստվե՛ք գրանցվելու։
Հոկտեմբերի 10-ին Եվրոպական հանձնաժողովը մեկնարկել է արվեստագետների և մշակութային գործիչների մշտական շարժունակությանն ուղղված իր նոր՝ «Culture Moves Europe» ծրագիրը, ինչպես նաև դրա շրջանակներում անհատական շարժունակության դրամաշնորհների առաջին մրցույթը:
«Ստեղծարար Եվրոպա» (Creative Europe) ծրագրի շրջանակներում երեք տարվա համար (2022-2025 թթ.) 21 միլիոն եվրո ընդհանուր բյուջեի շնորհիվ «Culture Moves Europe»-ը դառնում է արվեստագետների և մշակութային գործիչների շարժունակության խոշորագույն եվրոպական սխեման, որն ընդգրկում է «Ստեղծարար Եվրոպա»-ի «Մշակույթ» ուղղության մեջ ներառված բոլոր երկրները (ներառյալ Հայաստանը, Վրաստանը և Ուկրաինան) ու ոլորտները։
Եվրոպական հանձնաժողովի անունից Գյոթե ինստիտուտի կողմից իրականացվող «Culture Moves Europe» ծրագիրը ներառում է երկու գործողություն՝ անհատական շարժունակություն և կացություն: Շարժունակության դրամաշնորհների միջոցով այն շուրջ 7,000 անհատ արվեստագետների և մշակութային գործիչների հնարավորություն կտա մեկնել արտերկիր՝ ինչպես ԵՄ, այնպես էլ նրա սահմաններից դուրս: 2023 թվականի սկզբից նրանք նաև կկարողանան ապրել ու մշակութային գործունեություն ծավալել արտերկրում կամ հյուրընկալել օտարերկրյա արվեստագետների ու մշակույթի գործիչների:
Անհատական շարժունակության դրամաշնորհների առաջին մրցույթն ուղղված է ճարտարապետության, մշակութային ժառանգության, դիզայնի, նորաձևության դիզայնի, գրական թարգմանության, երաժշտության, վիզուալ արվեստի և կատարողական արվեստի ոլորտներում աշխատող արվեստագետներին և մշակութային գործիչներին:
Անհատական շարժունակության դրամաշնորհային մրցույթներն անցկացվելու են աշնանից մինչև գարուն՝ ամսական գնահատումներով:
«Culture Moves Europe»-ի շարժունակության դրամաշնորհը ներառում է ստանդարտ ճանապարհածախս (350 եվրո՝ մինչև 5000 կմ և 700 եվրո՝ 5001 կմ-ից ավելի հեռավորությունների համար, ընդ որում այն ներառում է դեպի մեկնման կետ և հետվերադարձի ծախսերը) և օրական 75 եվրո՝ որպես օրապահիկի և կեցության ծախսերի ապահովում:
Բացի այդ, նախատեսվում են մի շարք լրացուցիչ հատկացումներ, այդ թվում՝ վիզայի հետ կապված ծախսերի և ընտանեկան հատկացումների տեսքով այն արվետսագետների համար, ովքեր ունեն 10 տարեկանից փոքր երեխա: Ուկրաինացի արվեստագետները, ովքեր հնարավոր է չկարողանան լքել երկիրը, կարող են ուղղակիորեն դիմել վիրտուալ շարժունակության համար: Այդ դեպքում նրանք կստանան օրական 35 եվրո օրապահիկ։
Հոկտեմբերի 11-ին՝ Աղջիկ երեխաների միջազգային օրը, Թբիլիսիում կայացավ ԵՄ-ի կողմից աջակցվող «Էսման շարժի է գցում մեքենան» տիկնիկային շոուի պրեմիերան։
Շոուն ՄԱԿ-ի Բնակչության հիմնադրամի (ՄԱԲՀ) «Մի՛ տարբերակիր. թե աղջիկը և թե տղան երկուսն էլ քո ապագան են» խորագրով արշավի մի մասն է: Այն բեմադրվել է Վրաստանի ազգային պրոֆեսիոնալ տիկնիկային թատրոնների միության և Ախալցխայի պետական տիկնիկային թատրոնի հետ համագործակցությամբ ու կազմակերպվել է Թբիլիսիի պետական տիկնիկային թատրոնում։
«Էսման շարժի է գցում մեքենան» շոուն նախատեսված է 6-10 տարեկան աղջիկների և տղաների համար, ովքեր երազում են կոտրել հավասարության ճանապարհին առկա կարծրատիպերը և ցանկանում են փոխել աշխարհը։ Դա նաև նրանց ընտանիքների պատմությունն է, ովքեր հպարտանում են իրենց երեխաներով՝ անկախ սեռից։
Շոուի բեմադրիչը «Դուրուջի» թատերական մրցանակի դափնեկիր Էլենե Մածխոնաշվիլին է, իսկ սցենարի հեղինակը՝ «Սաբա» գրական մրցանակի դափնեկիր, դրամատուրգ Ալեքս Չիղվինաձեն։ Տիկնիկների ու դեկորացիաների հեղինակը նկարիչ Վախթանգ Կորիձեն է։
Շոուն պատրաստվել է Եվրոպական միության կողմից ֆինանսավորվող և ՄԱԲՀ-ի կողմից իրականացվող «Պտղի սեռով պայմանավորված խտրական ընտրության և հարակից վնասակար գործելակերպերի կանխարգելումը Հարավային Կովկասում» ծրագրի շրջանակներում։
Վրաստան. ԵՄ աջակցությամբ անցկացվել է «Այցելիր Ծալկա» գյուղական փառատոնը
Վրաստանի Ծալկա քաղաքում անցկացվել է «Այցելիր Ծալկա» գյուղական փառատոնը։ Այն կազմակերպվել է ԵՄ աջակցությամբ իրականացվող «EMBRACE Tsalka» նախագծի շրջանակներում՝ Կովկասի բնապահպանական ՀԿ-ների ցանցի (CENN), Ծալկայի տեղական գործողությունների խմբի (ՏԳԽ) և Վրաստանի ֆերմերների ասոցիացիայի կողմից:
Փառատոնի նպատակն էր բարձրացնել Ծալկա համայնքի մասին իրազեկության մակարդակը: Այն համախմբել էր երիտասարդներին, տեղի ձեռներեցներին, տեղական իշխանությունների ներկայացուցիչներին և Ծալկայի հյուրերին։
Փառատոնը ներառում էր ԵՄ կողմից ֆինանսավորվող ձեռներեցների, սկսնակ ձեռնարկությունների, փոքր բիզնեսների և այլ նախագծերի արտադրանքի ցուցահանդես ու վաճառք: Տեղի ունեցավ նաև երիտասարդների համար կրթական միջոցառում, որը ներառում էր մանկական նկարների ցուցահանդես-վաճառք։ Նկարների վաճառքից ստացված հասույթը նվիրաբերվեց ուկրաինացի ժողովրդին աջակցելու համար։
Փառատոնի հյուրերը նաև հնարավորություն ունեցան ուսումնասիրելու Ծալկայի կիրճի արշավային երթուղին:
Ապատեղեկատվության քողազերծում. գրքի շնորհանդես Թբիլիսիում
Հոկտեմբերի 14-ին Վրաստանի Ազգային գրադարանի դահլիճում տեղի ունեցավ Պիտեր Պոմերանցևի «Սա քարոզչություն չէ. արկածներ իրականության դեմ պատերազմում» գրքի վրացերեն թարգմանության շնորհանդեսը:
Շնորհանդեսը վարում էին Արդար ընտրությունների և ժողովրդավարության միջազգային կազմակերպության (ISFED) գործադիր տնօրեն Նինո Դոլիձեն, գրքի հեղինակ Պիտեր Պոմերանցևը և գրող Լաշա Բուգաձեն։
Գիրքը թարգմանվել և հրատարակվել է «Ինտելեկտ» հրատարակչության կողմից՝ ISFED-ի «Ապատեղեկատվության նկատմամբ հասարակության դիմակայունության ամրապնդում» ծրագրի շրջանակներում՝ Վրաստանում ԵՄ պատվիրակության ֆինանսական աջակցությամբ։
Պիտեր Պոմերանցևը խորհրդային ծագումով բրիտանացի լրագրող է, հեղինակ և հեռուստատեսային պրոդյուսեր: Նա Լոնդոնի տնտեսագիտության և քաղաքական գիտությունների դպրոցի (LSE) ավագ գիտաշխատող է և Ջոն Հոփկինսի համալսարանի գիտաշխատող: Պոմերանցևը զբաղվում է քսանմեկերորդ դարում տեղեկատվության մանիպուլյացիաների և դրանց հակաքայլերի ուսումնասիրություններով։
Նրա առաջին «Ոչինչ ճիշտ չէ և ամեն ինչ հնարավոր է» գիրքը վրացերենով լույս է տեսել 2017 թվականին։
ԵՄ-ն առաջարկում է չճանաչել Ուկրաինայի և Վրաստանի օկուպացված տարածքներում տրված ռուսական անձնագրերը
Հոկտեմբերի 12-ին ԵՄ դեսպանները համաձայնեցրել են Ուկրաինայում և Վրաստանում տրված ռուսական անձնագրերը չճանաչելու որոշման շուրջ Եվրոպական խորհրդարանի հետ բանակցելու մանդատը։
Այս որոշումը պատասխան է Ուկրաինայի դեմ Ռուսաստանի չհրահրված և չարդարացված ռազմական ագրեսիային և օկուպացված շրջանների բնակիչներին ռուսական անձնագրեր տրամադրելու գործելաոճին։ Այն նաև արձագանք է 2008 թվականին Աբխազիայի և Հարավային Օսիայի վրացական տարածքների անկախությունը ճանաչելու Ռուսաստանի միակողմանի որոշմանը:
Ուկրաինայի օկուպացված շրջաններում, Վրաստանից անջատված տարածքներում կամ այնտեղ բնակվող անձանց տրված ռուսական անձնագրերը վիզա ստանալու կամ Շենգենյան սահմանները հատելու համար վավեր ճամփորդական փաստաթղթեր չեն ճանաչվի։
Նշված տարածքներում տրված ռուսական անձնագրերն այլևս ենթակա չեն ճանաչման կամ գտնվում են ԵՄ անդամ երկրների կողմից չճանաչվելու գործընթացում: ԵՄ դեսպանների որոշումը, այսպիսով, ուղղված է ընդհանուր մոտեցման ձևավորմանը, ինչպես նաև արտաքին սահմանի պատշաճ գործառնության և ընդհանուր վիզային քաղաքականության ապահովմանը։
ԵՄ «Ստեղծարար Եվրոպա» ծրագիրը փնտրում է երկու կազմակերպություններից կազմված կոնսորցիում՝ եվրոպական երաժշտական ոլորտում գործող մեծ թվով կազմակերպություններում մրցունակությունը, նորարարությունը և բազմազանությունը խթանելու համար: Աշխատանքի մի մասը լինելու է այդ կազմակերպություններին ֆինանսական աջակցություն տրամադրելը։
Դիմելու իրավունք ունեն նաև Հայաստանը, Վրաստանը և Ուկրաինան ներկայացնող կազմակերպությունները (որպես երկրներ, որոնք ասոցացված են ԵՄ-ի «Ստեղծարար Եվրոպա» ծրագրին կամ բանակցում են դրան միանալու շուրջ՝ ծրագրի «Մշակույթ» ուղղության շրջանակներում):
Դիմորդները պետք է նախատեսեն երկու առանձին, բայց փոխկապակցված գործունեություն.
- ֆինանսական աջակցության սխեմա, որը վերաբաշխում է միջոցները երաժշտական ոլորտում գործող երրորդ անձանց:
- կենդանի երաժշտության ոլորտին ուղղված կարողությունների զարգացման միջոցառումների ծրագիր:
Սույն հայտամրցույթի համար նախատեսված բյուջեն կազմում է 4,5 միլիոն եվրո:
Դիմումների ընդունման վերջնաժամկետն է հունվարի 12-ը:
Հայաստանի, Ադրբեջանի, Բելառուսի, Վրաստանի, Մոլդովայի և Ուկրաինայի քաղաքացիական հասարակության կազմակերպությունների (ՔՀԿ) փորձագետները կարող են դիմել և մասնակցել Գենդերային մեյնսթրիմինգի և գենդերային վերլուծության թեմայով առցանց ՔՀԿ ակադեմիային։
Ակադեմիայի կազմակերպիչը ԵՄ կողմից ֆինանսավորվող «ԵՄ-ն հանուն գենդերային հավասարության. բարեփոխումներին աջակցության ծառայություն» (EU4Gender Equality Reform Helpdesk) ծրագիրն է։ Այն կանցկացվի 2022 թվականի նոյեմբերից մինչև 2023 թվականի մայիսն ընկած ժամանակահատվածում։
ՔՀԿ ակադեմիայի ծրագիրը ներառում է առցանց սեմինարներ, խորհրդատվություն / մենթորություն, գործնական տնային աշխատանք, ինքնուրույն ուսուցում, գործնական կապերի ընդլայնում և վերապատրաստման երկու փուլ՝ փորձագետների վերապատրաստման խորացված ծրագիր և ուսուցանողների վերապատրաստման (ToT) դասընթաց։
Վերապատրաստման խորացված ծրագիրը բաղկացած է չորս մոդուլից, որոնցից յուրաքանչյուրն անցկացվում է ամիսը մեկ անգամ և տևում է երկու-երեք օր: Չորս մոդուլները հաջողությամբ ավարտելուց հետո ունկնդիրը կկարողանա մասնակցել ուսուցանողների վերապատրաստման (ToT) դասընթացին։
Աշխատանքային լեզուներն են անգլերենը և ռուսերենը, նաև կապահովվի համաժամանակյա թարգմանություն։
Մոդուլների միջև ընկած ժամանակահատվածում ունկնդիրները կստանան իրենց լեզուներով աջակցություն (առցանց խորհրդատվություն / մենթորություն) EU4Gender Equality Reform Helpdesk-ի ազգային թիմերի կողմից։
Դիմելու վերջնաժամկետն է 2022 թվականի հոկտեմբերի 15-ը։
«10 օր» նախագիծն իրականացվում է ԵՄ Արևելյան հարևաններ ծրագրի և Լրատվական ռադիոյի հետ համատեղ:
Վրաստանում ԵՄ ֆինանսավորմամբ ծրագրերից ավելի շատ լուրերի և հնարավորությունների ծանոթանալու համար այցելեք ԵՄ Արևելյան հարևաններ ծրագրի կայք։
Opinion, pooling and voting
