ԵՄ-ն սառեցրել է 17,5 միլիարդ եվրոյի ռուսական ակտիվները

Եվրամիությունն այժմ սառեցրել է 17,5 միլիարդ եվրոյի ռուսական ակտիվները։ Այս մասին ավստրիական ORF հանրային հեռարձակողին ասել է Եվրահանձնաժողովի ներկայացուցիչ Քրիստիան Վիգանդան, փոխանցում է Ukrinform-ը։

Խոսելով ռուսական սառեցված ակտիվների մասին՝ Եվրահանձնաժողովի ներկայացուցիչն ասել է. «Մենք զգալի առաջընթաց ենք գրանցել՝ սկսած ապրիլից։ Մոտ 6,7 միլիարդ եվրոյից, այսօր հասել ենք 17,5 միլիարդ եվրոյի»։

Նրա խոսքով՝ խոսքը 1350 անհատների ու կազմակերպությունների ակտիվների մասին է, որոնք գտնվում են ԵՄ պատժամիջոցների ցուցակներում։ Հաշիվները, անշարժ գույքը և զբոսանավերը վերահսկվում և սառեցվում են ԵՄ անդամ երկրների կողմից:

Այս գումարի մեծ մասը սառեցրել են ԵՄ յոթ երկրներ՝ Գերմանիան, Բելգիան, Ֆրանսիան, Լյուքսեմբուրգը, Իռլանդիան, Իտալիան և Ավստրիան։ Ըստ Վիգանդի՝ դա պայմանավորված է ոչ միայն այս երկրներում գտնվող ունեցվածքով, այլեւ իշխանությունների աշխատանքով, ինչպես նաեւ պատժամիջոցների արդյունավետ կիրառմամբ։

Եվրահանձնաժողովի ներկայացուցիչը հավելել է, որ որոշ երկրներ «դեռ պետք է կատարեն իրենց տնային աշխատանքը»։ Միաժամանակ նա չի հաստատել կամ հերքել տեղեկությունը, որ Հունգարիան սառեցրել է ընդամենը մի քանի հազար եվրո ռուսական ակտիվներ։

Վիգանդը նաև ասել է, որ ակտիվներն այժմ սառեցված են, սակայն դրանց օգտագործումը, օրինակ, Ուկրաինայի վերականգնման համար պահանջում է բռնագրավում և համապատասխան օրենսդրական դաշտ։

Ինչպես հաղորդում է «Ուկրինֆորմ»-ը, Եվրահանձնաժողովի նախագահ Ուրսուլա ֆոն դեր Լեյենը հայտարարել է, որ Եվրամիությունը շատ բան է արել ռուսական ակտիվները սառեցնելու և ռուսական «ռազմական մեքենայի» ֆինանսավորման համար դրանց օգտագործումը սահմանափակելու համար, սակայն դրանք բռնագրավելու և ուղարկելու հնարավորությունը Ուկրաինայի վերականգնման համար՝ պետք է մշակվի իրավական տեսանկյունից։

---

---