Թուրքիայում երկրաշարժի հետևանքները չէին լինի այդքան ողբերգական, եթե պահպանվեին կառուցապատման նորմերը

Թուրքիայում նոր քրեական գործեր են հարուցվել երկրաշարժի գոտում շինարարական նորմերի խախտման կապակցությամբ: Անբարեխիղճ կառուցապատման խնդիրը քաղաքական երանգներ է ստանում, քանի որ կարող է կարևոր գործոն դառնալ գալիք նախագահական ընտրարշավի ընթացքում:

Շինարարական նորմերի ի՞նչ տեսակի խախտումներ են բացահայտվել և ի՞նչ հետևանքներ կունենան:

Թեմային «Հորիզոնի» տաղավարում անդրադարձել Արտյոմ Երկանյանը:

«Երկրաշարժից տուժած 10 նահանգներում, դատախազություններում ստեղծվել են հատուկ բաժիններ, որոնք զբաղվում են այդ շինարարական նորմերի խախտման դեպքերով և արդեն 131 անձի վերաբերյալ հետախուզում է հայտարարված, կան արդեն ձերբակալվածներ:

Ամենատարածված շինարարական նորմերի խախտումն այն է, երբ չնախատեսված հարկեր են ավելացվել շենքերի վրա՝ կա՛մ վաղուց կառուցված շենքերի վրա, կա՛մ ենթադրենք շինթույլտվությունը տրված է եղել 4 հարկանի շենք կառուցելու համար, սակայն արդյունքում շենքը 7 հարկանի էր կառուցվել: Այդ ամենի վրա չինովնիկներն աչք էին փակում:

Ի դեպ, գիտենք, որ հաճախ նման բան նաև Երևանում է տեղի ունենում, դա պետք է ևս հաշվի առնեն մեր պաշտոնյաները:

Սակայն Թուրքիայի պարագայում դա է՛լ ավելի անընդունելի է, հաշվի առնելով այն, որ Թուրքիան մտնում է աշխարհի ամենասեյսմավտանգ 5 պետությունների մեջ:

Տարբեր լրատվամիջոցներ այժմ սեփական հետազոտություններն են անցկացնում. մասնավորապես NTV թուրքական պարբերականը պարզել է, որ Հաթայ քաղաքում մի խայտառակ դեպք է արձանագրվել, երբ նորակառույց շենքի հիմքում ցեմենտի փոխարեն կամ ցեմենտի հետ միասին նաև օգտագործվել է փրփրաթիթեղ՝ այդ պենոպլաստ կոչվածը: Արդեն քրեական գործ է հարուցվում: Իսկ բրիտանական BBC-ն սեփական հետազոտությունն է անցկացրել ու պարզել է, որ Մալաթիայում և Անտալիայում չեն փլուզվել 1960-ական թթ.-ին կառուցված շենքերը, բայց փլվել են 2019-20թթ.-ին կառուցված նոր ՝ էլիտար կոչվող բարձրահարկ շենքերը, որոնք ներկայացված էին որպես սեյսմավտանգ և պետք է դիմակայեին մինչև 10 բալ երկրաշարժի»,- ասել է Երկանյանը:https://www.shantnews.am/news/view/1265310.html

---

---