Լրագրողների մի մասին թույլ չեն տվել մտնել Վրաստանի խորհրդարանի շենք՝ չնայած անցաթղթի առկայությանը
Լրատվամիջոցների որոշ ներկայացուցիչների, ովքեր ստացել են անցագիր, թույլ չեն տվել մտնել Վրաստանի խորհրդարանի շենք։ Պահակները պնդել են, որ սահմանափակումը մտցվել է խորհրդարանի նախագահ Շալվա Պապուաշվիլիի հրամանով։
Բացի այդ, շենք մտնելուց առաջ լրատվամիջոցների ներկայացուցիչները խուզարկվել են, մի քանիսի մոտից վերցվել են բողոքի գրություններով պաստառներ։
Խորհրդարանի նախագահ Շալվա Պապուաշվիլին մեկնաբանել է խորհրդարանի շենք լրագրողների մուտքի սահմանափակումները՝ նշելով, որ խորհրդարանի շենքն այն վայրը չէ, որտեղ թույլատրվում է հանրահավաք անցկացնել։
«Ինչ վերաբերում է հավաքների ազատությանը, ապա բոլորը կարող են իրենց անհամաձայնությունն արտահայտել ցանկացած հարցի շուրջ, բայց երբ դա տեղի է ունենում շենքում և խանգարում է գործունեությանը, դա անթույլատրելի է», – ասել է Շալվա Պապուաշվիլին:
Այսօր՝ փետրվարի 27-ին, Վրաստանի խորհրդարանի բյուրոյին կներկայացվի «Օտարերկրյա գործակալների գրանցման մասին» օրենքի երկրորդ նախագիծը։ Նման օրենք Ռուսաստանի Դաշնությունում ընդունվել է 2012 թվականին, և դրանից հետո երկրում գործնականում չի մնացել որևէ անկախ լրատվամիջոց կամ հասարակական կազմակերպություն։
