Սամցխե-Ջավախեթիի խորհրդարանական պատգամավորներն «Գործակալների մասին» օրինագծերի վերաբերյալ մեկնաբանթյուն չեն անում

Խորհրդարանական հանձնաժողովներում քննարկվում են «Վրացական երազանքներից» «ժողովրդական իշխանության» անցած պատգամավորների նախաձեռնած «արտաքին ազդեցության գործակալների» օրինագծերը։ Գործընթացն ընթանում է քաղաքացիական սեկտորի, լրագրողների և ընդդիմադիր կուսակցությունների բողոքի ֆոնին։ «Հարավային Դարպաս»-ին հետաքրքրում էր, թե ինչպես են Սամցխե-Ջավախեթիի խորհրդարանական պատգամավորները գնահատում օրինագծերը եւ նախատեսում են աջակցել, թե ոչ։
Խորհրդարանում մարզից երեք պատգամավոր կա, երեքի հետ էլ խմբագիրները կապ հաստատեցին, բայց մեր հարցերին ոչ ոք չպատասխանեց։
«Ես արձակուրդում եմ, այս օրենքից ոչինչ չգիտեմ, երբ հասնեմ կհարցնեմ, հետո կպատասխանեմ»,- մեզ հետ զրույցում ասաց Ախալքալաքի և Նինոծմինդայի մեծամասնական պատգամավոր Սամվել Մանուկյանը։ Խորհրդարանի կայքում հրապարակված տվյալների համաձայն՝ նա Ագրարային հարցերի հանձնաժողովի նախագահի տեղակալն է։
Չնայած բազմաթիվ հեռախոսազանգերին և կարճ հաղորդագրություններ ուղարկելուն, մենք չկարողացանք պատասխան ստանալ անգամ Սամցխեի մեծամասնության պատգամավորից։ Անտոն Օբոլաշվիլին չի մեկնաբանել «Հարավային դարպասին»։ Օբոլաշվիլին ֆինանսաբյուջետային և առողջապահական հանձնաժողովների անդամ է։
Համամասնական ցուցակով պատգամավոր Սումբատ Կյուրեղյանը նախընտրեց լռությունը.
«Ես չեմ կարող իմ դիրքորոշումը ձեզ ասել այս փուլում, երբ օրենքն ընդունեն, հետո ուղղեք այդ հարցը ինձ։ Օրենքը կամ կընդունվի, կամ ոչ։ Երբ որոշվի, ես ձեզ կպատասխանեմ՝ պաշտպանեմ, թե ոչ»,- մեզ հետ զրույցում ասաց Սումբատ Կյուրեղյանը։ Ագրարային հարցերի հանձնաժողովի անդամ է։
Տեղեկության համար՝ «Ժողովրդական իշխանության» առաջին օրինագիծը նախաձեռնել էր փետրվարի 14-ին։ Փաստաթղթի համաձայն՝ արտաքին ազդեցության թափանցիկությունն ապահովելու համար կստեղծվի «օտարերկրյա ազդեցության գործակալների» ռեգիստր, որտեղ կգրանցվեն բոլոր ոչ բիզնես իրավաբանական անձինք և լրատվամիջոցները, որոնց եկամուտների ավելի քան 20 տոկոսը ֆինանսավորվում են օտարերկրյա ուժերի կողմից։ sknews.ge

• «Գործակալների մասին» օրինագծերը կքննարկվեն մարտի 9-ին

---

---